Parliament-ah Manipur buaina sawiho phutna MP-in thehlut

Parliament-ah Manipur buaina
sawiho phutna MP-in thehlut
Parliament Monsoon Session-ah Mizoram Rajya Sabha MP K Vanlalvena chuan Manipur buaina sawiho phutna ziakin a thlen.
Parliament Session hi July 20 khan tan a ni a, Rajya Sabha chairman Jagdeep Dhankar hnenah Parliament dan hman mek, Rule 267 tlawhchhanin session kal lai titawp a, Manipur buaina leh thil thleng chungchang sawihona, July 24-a hawn a phut thu K Vanlalvena hian ziakin a thlen a ni.
“Manipura chi leh chi inkara buaina avang hian mi 140 aia tam thi tawhin, mi tamtakin hliam an tuar a. Thenawm ram hmun dangah mi 50000 chuang an tlanchhe tawh a, in 5000 chuang hal tawh niin, biak in 300 chuang tih chhiat leh hal a ni a, Mizo hnahthlak hmeichhia leh naupangte pawngsual leh nghaisak an ni,” tiin a thu thlenah hian a ziak a ni.
Manipur thil thleng sawiho phut hian eptu party MP engemawzatin session tan ni atangin Parliament House-ah bengchheng an siam a. Thurel mumal awm loin nikhatna hi tiltiak a ni. A ni hnihna, July 21-ah pawh hei vang tho hian Parliament rorel a kaltluang thei lo.
Parliament rorel kaltluanglo chungin Mizoram Rajya Sabha MP zawhna, DoNER leh Commerce & Industry changtu Union minister pahnihten ziaka an chhannaah, Mizoram chhimlam kawtchhuah thar tur KMMTTP Road chu July 2025 ah hawn beisei a ni a; Kawrpuichhuah Border Trade Centre dinna tur DPR chu Bangladesh sawrkarin a tih ve tur a peih hunah zawh a nih tur thu sawi a ni. Sangau – Saisihchhuah kawng laih tura ruahman sa thawk loa cancel tak chu, Committee-in a ngaihtuah that leh tur thu a chhan a ni bawk.