Party mi hna inpek sawiseltute hian an lo tih dan ve tho a ni – Prof. Lalnilawma

ZPM party mi thenkhatin hna an thawh ve avanga sawiseltute chuan a hmaa an lo tih thin dan ve tho a ni tih minister Prof. Lalnilawma chuan a sawi.
Thawhtannia ZPM party office-a inkhawmah ZPM hruaitu Prof. Lalnilawma chuan, ZPM sawrkarah chuan hna a tha tur a ni a, kan hnathawh a tha tawk lo a ni pawhin mipuiin min sawisel tur a ni, tiin, inenlet a, siamtha leh tur an ni tih a sawi. “A tha zawnga insawisel hi chu mi tupawhin kan pawm thiam vek,” a ti.
Tunhnaiah an party mi leh sa thenkhatin hna an han thawk ve a, mi thenkhatin departmental work-ah work supervisor an ruat ti ang zawngin an sawisel a, a sawiseitute hian an lo tih dan vek a ni tih a sawi. “A thawktu niloin an hnathawh hi kan en zawk tur a ni a, a tha lo a nih chuan kan sawisel mai tur a ni. Politics a nih avanga thudik chanve hmanga inbeih hi tawp se, kan ram leh hnam tana tha turah chuan inlungrual takin hna thawh ho puiah opposition lam pawh ka sawm a ni,” a ti.
Zoramah politics thianghlim zawk kan tunnun theih nan insawisel hmasa ngawt loin thurawn tha zawk inpe tam ila, lehlam party an nih avang maia sawiselna tur zawn ringawt chu a fel lo, tiin, sawrkar thawhpuitu khua leh tui tha tak ni turin mipui a sawm tih a sawi.
Tunlaia tui harsatna sukiang turin department-in theihtawp a chhuah a, a hah pawh an hah thin hle tih PHE minister Prof Lalnilawma hian a sawi. “Chhun leh zan zawmin, Pathianni pawh sawi hleithei loin rim takin hna an thawk thin. Kan lui tui tlante kan duat a ngai a, tunlaiin mi thahnemngaiten lui dung thianfaiin an hnatlang thin a, mipui pawh kan bawlhhlawh paih danah fimkhur lehzual kan ngai. Tui hi kan nunna hnar a ni a, kan lui a lo thianghlim zawk nan bawlhhlawh kan sawngbawl danah mipuiin hma kan sawn a ngai,” a ti.