PARTY POLITICS-A CORRUPTION A RUH LANGIN

Rev. Dr. Zaichhâwna Hlâwndo
Kan rawngbawltu pastor-te zinga kan chhuanvawr leh hriat lar tak pakhat chuan party office pakhatah “Kan MLA ten corruption an tih ve loh avangin a lawmawm em a, kut i beng teh ang u” a tih kha ka lo ngaithla fuh hlauh mai a. Chu chuan min deng dawt mai a, Bible ah amah kan Lalpa Isua Krista thusawi kha rilruah a lo lang a. Matthaia 15:14 “Anni chu pawisa suh u; hruaitu mitdel an ni. Tichuan, mitdelin mitdel vek a hruai chuan khuarkhurumah an tla dun ang,” a ti a, a chhang a tih kha kan ni thei dawn a nih hi mawle, ka ti hial a. Heta Lal Isua thusawi kan hmuh ang din hmunah hian kan ram leh hnam hi kan awm mêk a ni mai awm mang e tihte pawh min ngaihtuahtir. Kan ram party politics bawlhhlawh tak maia eirukna (corruption) inphum dan leh zung a kaih dan hi kan kohhran pastor te leh rawngbawltute hian kan hmu lo tak tak nge kan hai der? Hetiang khawpa mipui nawlpui pawhin kan hmuh leh hriat party politics a eirûkna (corruption) hi kohhran hruaituten kan lo hre lo tak tak a nih chuan kan thlarau mit chauh ni lovin kan taksa mit pawh a lo del nasa hle tihna a ni ang.
Political Corruption (eirûkna) kan tih chu dik lo taka sum leh pai hmanga lalna tura beih te, vote lei te, MLA nih avanga thuneihna dik lo taka hman sualna te, mahni hlawh duh tawk lova sum lo dawn emaw siam te, contractor ni lo contract hna pek te, party unit leh block hruaitute duhsak bik vanga hna pek te, chhungte emaw party mi leh sate an nih avanga duh sak bik te leh sawrkar sum dik lo taka ei, hman leh dan leh dun pal zutte hi an ni.
Kan rama eirukna (corruption) chungchang hi ka ziak nual tawh a. Eiruk dan chi hrang hrang pawh ka ziak tawh a. Tuna kan pastor pakhatin MLA ten an eiru lo a tih lai tak hi ngaihtuah leh zir chian ngai chu a ni. Amah ngei pawh he a thusawi zawh chian tumin ka phone a, phone a la remchang lova, thuthawn (message) hmangin MLA ten an eiru lo a, eiruknaah an fihlim a tihna chhan leh eirukna (corruption) a tih hi eng nge tih min hrilhfiah turin ka ngen a, a chhanna ka hmu rih lo. Ka rin dan chuan kan MLA te hian langsar tak leh mualpho takin sum an eiruk a hriat loh thu a sawina a nih hmel. Chu pawh ni se MLA te awm dan hre vektu chu Pathian chauh a ni a, huai taka an dinhmun ni awm a hriat lo sawi mai kha chu thil tihchiah kei chuan ka ngai lo.
Heti tak maia sual setanan kan ram leh hnam political corruption – eirukna hmanga min eichhiat dan te, min tihhlum nasatziate hi kan hai der zel a nih chuan a mawh phurtuah kohhran rawngbawltute hi kan bang bik lo tihna a ni ang.
Party politics hmanga MLA ni tur chuan politics tui nu-ah luh ngei ngei a ngai a. Chu politics leh Pathian thianghlimna chu thil inpersan a ni. Sum hmanga lal leh thuneihna chang tura a ruka beihna hmun a ni a. Bible chuan tangka sum ngainat hi sual tinreng bul (corruption zung) a ni a ti (1Timothea 6:10). MLA inthlanah term hnih kan luhchilh tawh a party politics ah, corruption lui a luan dan chu bengin kan hre mai a ni lo a, mitin kan hmu. MLA nih hnu chu sawi loh, nih hma pawh khan kan MLA te hian an lal vena turin sum leh pai dik lo taka hmannaah hian an lo inhnamhnawih daih tawh zawk a ni. Bible chuan mahni aiin midang tha zawkah ruat rawh u ( Philippi 2:3) tiin min zirtir laiin party politics a lut a, MLA nih tumte thupui ber chu midang sual chhe lailet der ang maia puh leh mahni leh awmna party sawimawi kha a ni. Bible chuan sawisel suh u, sawisela in awm loh nan (Matthaia 7:1) tiin min zirtir laiin MLA nih tumte leh tuna ni mekte hnapui chu insawisel tawn hi a ni ber tih mai tur a ni. Chuvang chuan tuna kan rama party politics leh Pathian thu kal kawp sawiloh a inkalh vel vek a ni ber mai. Party politics a awm a, eiruk loh, corruption-a fihlim tum chu “Changela sawi bel tum ang vel a ni”. Amah kan CM hlui Pu Hawla’n “Corruption chu a zunga phawi a, phoro va, halral tur” a tih kha ka hmuh ve dan chuan tuna kan rama party politics, eirukna ( corruption) system hmanga sawrkarna kan siam hi a ni. A mihring te hi eiruk duh kan ni ta vek tihna a ni lo. A kalphung (system) hi a corrupt tlat avangin kan duh emaw duh lo emaw eirkna (corruption) ah hian kan MLA te hi an fihlim thei lo zawk a ni. Eng anga mifel leh tha, Pathian tihmi tan pawh tuna party politics kan kalpui dan atang hian eirukna (corruption) atangin a fihlim theih miah loh zawk a ni.
Party politics a corruption hi zep then lovin, a ruh langin hai ngam ila. Ni chu ni, ni lo chu ni lo ni mai se. Party politics bawlhhlawh tak leh Pathian thu hi chu sawi pawlh lo law law ila Lalpa pawh a lawm zawkin ka ring. Ka lal ram chu khawvel ami a ni lo, a tih kha he party politics system remlohnain tawpintai nei lo sawrkarna hi a ni. Pathian Lal Ram Sawrkar (PLRS) Lalpan min din sak tur chu remnain tawpintai nei lo tur a ni dawn. Lalpan Zofate tan, Pathian chhungte tana rorelna thianghlim min pek chuan corruption chu a zungah phawiin min halralsak ang tih hi kan ringin kan beisei tlat a ni.