PATHIAN LAL RAM I LUAH THUAI ANG U

By Lalhluna Ph.no.7085209548
Kan thupui hi “Pathian Lalram i luah thuai ang u” tih a ni tlat mai. Hetiang zawnga thupui vuah hi chu kan la hre tam lo mai thei. I ram lo thleng rawh se tih te, A ram leh a felna chu zawng hmasa zawk rawh u tihte chu kan hre fo tawh a. Heti zawng hian ka rilruah a awm tlat mai a, a danglam in ti deuh mai thei. A tira ka rilrua a awm dan tak chu, “Lalram i luah ang u,” tih a ni mai a. Ka han ngaihtuah chhoh zelnaah a hmanhmawh thlakzia ka rilruah a chiang tawlh tawlh a, hetiang hian, “ Pathian lalram i luah thuai ang u,” tiin ka han dah ta hluai mai a ni.
Israel fate kha Aigupta bawih atanga chhanchhuah ringawt kha Pathian thiltum a ni lo va. An Pu Abrahama hnena ram pek a tiam Kanaan ram, khawizu leh hnute tuia luang ram luahtir kha a tum a ni a. Ni 40 chhung leka thleng chhova, luah thei mai tur kha an nih vei nen an thuawih loh leh an luhlul avangin, kum sawm li lai thlalerah thihna leh hreawm tam tak an tuar a. A tira chhuak puitling kum 20 chin chung lam phei chu Joshua leh Kaleba chauh lo chu an thi mang vek nghe nghe a, chumi hnuah an fanaute chuan Kanaan ram an lut ta chauh kha a ni a. Keini Kristiante pawh hi Setana sual saltanna, thihna ata min chhandam chauh hi Pathian thil tum a ni lova. He leia kan dam chhung atang ngeia Pathian lalram thianghlim leh chenghnawng tak min luahtir nghal hi a tum a ni. Nimahsela, kan thuawih loh leh luhlul avangin retheihna, natna hreawm leh thihna tam tak kan tawrh phah ta a ni, tih hi hrechhuakin, i tho harh thuai ang u.
1. Pathian lalram chu eng ang nge ni?
Lal Isuan he leia a lo kal a, rawngbawl hna a thawh tan lai khan, a thusawi hmasak ber chu, “ Sim rawh u, Pathian lalram a hnai ta,” tih thu hi a ni. A hma lawkin Baptistu Johanan, “Sim rawh u, Vanram a hnai tawh e,” tiin a lo sawi tawh bawk a, an sawi tum a thuhmun awm e. Heta Lal Isuan Pathian lalram a hnai tawh e, a tih chiah hi, kan thu sawi tum Pathian lalram kan luah tur chu a ni e. Lal Isuan, “ Pathian lalram chu in chhungah a awm,” te a ti bawk. Chumi awmzia chu Pathian lalna ram, Pathian rorelna, a thuneihna ram chu in chhungah a awm a tihna a ni a. Paula pawhin, “ Pathian in in nih leh, Pathian thlarau nangmahniah a awm reng tih in hre lo em nit a lo ti bawk (1 Kor 6:19,20).
Lal Isua tisa put lai khan Amah kha Pathian lalram a ni nghal a, mihringte a rawn hnaih chilh a, mihring zingah a rawn awm a. Amaherawhchu, kraws-a a thih tleitlak hma loh chuan, Pathian lalram chu luah theihin a la awm lova. Lal Isuan, kraws lera a thih dawn a, “ A kin ta”(thawh zawh a ni ta) a tih atang khan chhandamna leh lalram luah tur chu engkim peih a ni ta a. Pathianin A lalram chu luah theih turin a hawng ta a ni. Haleluia, Lalpa chu fakin awm rawh se. Amaherawh chu ringtu piangthar nih loh chuan lalram chu a luah theih lohva, pianthar phawt a ngai tih i hre hmasa ang u.
Pathian lalram luahna daltu min then faisak a, luah dan min zirtir
Pathian lalram chu Krista ringtu, mi piangthar tam ber hian kan luah nghal mai thin lo, luah nghal theih reng a ni si a. Kan Eden sual pianpui, keimahnia bet tlat, mihring hlui tia Paulan a sawi hian a dal tlat vang a ni. Mihring hlui hi thinlung kan tih hi a ni a, he sual hlawm vang hian Pathian duh dan chu kan tlin thei hauh lo mai. Jeremia 17:9 ah chuan, “Thinlung hi thil zawng zawng aiin bum hmang ber, chhe lailet der a ni a, tuin nge hrethiam thei ang,” tiin a lo sawi hial a ni. Chuvangin kan mihring hlui, thinlung hi Pathianin siam that a tum lova, siam that tlak pawh a ni hek lo, setana tihbawlhhlawh tawh hnu a ni a(Eze.36:26). Chuvangin Pathianin a hnawl a, thiamloh a chantir a, tihboral daiha, a thara thlak a duh a. Fing tak leh rem hre takin remruatna a siam a. Kraws-a Krista thihnaah khan mihring hlui chu Kristaah khengbet tel vein, a tihlum a, thlanah phum bovin, Krista rual vekin mihring tharin, thlarau tharin a kaitho ve leh ta a ni. Chu chu Kraws-a Krista thihna hmanga kan tana Pathian thiltihmak, thuruk ropui tak chu a va ni em! Haleluiah!
Chutiang chuan Krista thihna chu kan mihring hlui thihnaah Pathianin a pawm hmiah a, a hrana keimahni kraws-a thi nia va inhriat chian viau emaw, thia va inhmuh ve kher emaw a ngai lova. Krista thihna kha ka thihna a ni tia rin/innghah mai kha a tawk em em a, a awlsam thlakin, a hahdam thlak em em a ni. Chu Krista thihna chu ka thihna a ni tia rin/pawm hmiah mai chu kan tih dan tur chu a ni mai. Chutia kan pawmna chu Thlarau Thianghlimin mal a sawm a, a tinung a, nun danglamna mak tak keimahniah a thlen ta thin a ni. Chu chu Pathian lalrama luh a, luahna chu a ni der mai. Chu chiah chu mahni hrehawm pawisa lova, mahni kraws pua Lal Isua zui nun chu a ni. Bible-in, “Thlarauah awm rawh u”, a tihte, “Thlarau hruaiin awm rawh u,” a tihte Nih dikna a ni. Amaherawh chu vawi khat zuk luah mai a, chhuahsan leh mai hi thil awm thei a ni a. Chutiang ni lovin luah reng tur a ni.
3. Pathian lalram luah leh Sawrkar hnathawh dan tehkhinna
Sawrkarin a hnathawk tura a lakte chu appointment letter pein a nemnghet a. Chung mite chuan sawrkarin nihna, dinhmun a pek chu lawm takin an pawm a, an luah nghal a. An hnathawh tur sawrkarin a ruat apiang chu ringhlel hauh lo leh phur takin an thawk hmiah hmiah mai thin a ni. Mihring sawrkar aia ropui zawk, lei leh van Lal ber, Pathian te Pathian, Van Sawrkarin kan nihna min pek kan luah theih nana, krawsa Krista thihnaa kan mihring hlui ching ral a, tiboral a, thlanah a phum bo daih hnua, Krista ruala mihring thara, thlarau thara min kaithawhna, Bible-a ziak meuha kan nihna min nemghehsak hi kan pawmin, kan luah ve mai dawn lawm nit Mahni lam inchinfel hmasak phawt a, pawm chauh a tul lo, kan awm ang ang hian kan pawmin kan luah nghal thei a nih chu. Lalpa chu fakin awm rawh se!
Chu Kristaa kan nihna ropui tak chu a pawmtu leh pawm lotu dinhmun chu a kar a hlain, a inang lo nasa mai, thim leh eng ang hlauh a ni. Chu nihna luah lotute chu Kristian tisa mi an ni a, Pathian duh zawngin an awm thei reng reng lo. Pathian lung an tiawi thei lova, an tilawm thei hek lo. Krista thihnaa Pathianin kan nihna atana a ruat chu pawm a, luahtute erawh chu ringtu thlarau mi an ni a, Pathian lalram luahtute an ni. Chung mite chu Thlarau Thianghlimin nun thar, thinlung thar a pe a, Thlarau Thianghlim hruaiin an awm a, Pathian fate tih an ni ta a ni ( Rom 8:14; Gal 3:26).
4. Pathian lalram luah tute nun chu khenbeh nun
Eden sual man thihna laka Pathianin min chhandama, a hnena kan thlarau chatuana a chen chauh hi a duh dan a ni lo tih kan sawi tawh a. He leia taksaa kan awm lai atanga a lalram luah a, van nun thianghlima, in hmangaih tawna kan chenho dial dial hi a duh dan leh a tum a ni. Chu chauh pawh ni lovin, Pathianah leh a chakna thahruiah thiltihtheihna neia kan awm a, setana ram chhuhsak a, sual bawiha tang mihring khawngaihthlak tak tak te chhanchhuah a, a faa siam turin min duh a ni. Chutianga chhandamna hna thawk thei tur chuan min tihnawktu keimahnia sual bet tlat chu min chin ralsak vek a ni. Rom 6:6-ah chuan heti hian Tirhkoh Paul-an a ti, “ Heng hi hria ila kan mihring hlui chu a hnenah khenbehin a awm ve ta; sualpu taksa chu tihborala a awm theih nan, tun achinah sual bawiha kan awm tawh lohna turin,” a ti a. Gal 2:20-ah chuan heti hian a ti bawk, “ Krista hnenah khenbehin ka awm ta;nimahsela ka nung a ni;keimah erawh chu ka ni tawh lo, Krista chu keimahah a nung zawk a ni,” a ti hmiah mai. “Nun hi Krista a ni a, thih pawh hlawkna a ni,” a ti bawk (Phil 1:21). “Keini zawng Van khua leh tui kan ni si a; Van atanga min chhandamtu Lal Isua Krista lo kal tur chu nghakhlel takin kan thlir a ni,” te a ti a (Phil 3:20). Leia awm reng chungin, “Kan khawsakna chu van a ni si a,” te a ti bawk .
Hlain, “He lei ram mi kan ni lo, Van Lal fa duh tak te chu, hma lam panin kan kal zel dawn, he lei hi hnutiang chhawnin,”tih hlate pawh kan sak thin hi.
Pathian lalram luahtu Paula chuan, “Khawvel hi ka tan khenbehin a awm ta, kei pawh khawvel tan khenbehin ka awm a ni,” a ti hmiah mai a (Gal 6:14), a va awhawm em! Keini khawvelin min tihbuai teh reng nen.
5. Engtinnge Pathian lalram chu kan luah theih angt
Pathian lalram luah theih dan tur chu kan sawi takah khan a chiang tawh sa reng naa, i han sawi nawn leh teh ang, sawi nawn a nuam bawk si a. A hmasa berin Krista chu Krawsah kan tan a thi a, kei chu ka nung ta, chhandam, piangthar ka ni ta tih kan rin a, hriatchianna kan neih phawt a ngai a ni. Chu chu a kalkawng rahbi pakhatna a ni. A rahbi pahnihna chu Pathian thinlungah, “Kan mihring hlui, sual kawnga min hruaitu ber chu Kristaah chuan khenbehin a awm a, a thi ta a, a aiah keimahniah Krista chu a lo nung ta zawk a ni,” tih Bible-in chiang taka a lo sawi chu ringhlel hauh lova rin a, kan nihnaa pawm hmiah tur a ni. Chu chu Pathian lalram luah dan kawng dik tak chu a ni.
Chu Thutak chu a hriat thiam theih mai a, a thu (theory) chuan kan ring thei nghal mai bawk a. Amaherawh chu hei hi thlarau lam thil a ni a, Thlarau Thianghlimin a tihnun loh chuan mihring rinna leh pawmna ngau ngau chu engtihna mah a ni lo. Thlarau Thianghlim a chet a, a tihnun a ngai a ni (Tita 3:4-7). Thlarau Thianghlim chetna tur chuan duh ve satliah mai mai ni lovin, thildang zawng zawng aia kan duh a, kan thlana, tihtakmeuhva kan dil a ngai a ni. Pathian thu chuan, “Min zawng ang a, in thinlung zawng zawnga min zawn hunah min hmu ang,” a ti tlat mai (Jeremia 29:13). Tihtakmeuhva zawna, dil a ngai a nih chu. Engpawh kan chungah thleng dawn se, engkim chan dawn mah ila, pawi tih hauh loh a ngai a ni. Marin, “Ngai teh, Lalpa bawihnu ka ni, I thu ang zelin ka chungah thleng rawh se,”a tih anga kan tih ve a ngai a nih chu. Chumi dinhmun atanga Pathian kan dawr chuan Tinungtu Thlarau Thianghlim chu a che ngei ngei dawn a ni. Chutianga i tih hun chu Pathianin a nghak reng a ni. Tun hi hun lawmawm chu a ni a, tun hi chhandamna ni chu a ni ( II Kor 6:2 ). Nang muhil meng la, mitthi zing ata tho rawh, tichuan Krista chuan a chhun eng ang che ( Ephesi 5:4).
6. Pathian lalram i luah thuai ang u
Juda ten an Lal Messia an hai a, an hnawl fithla thak a, an khenbeh tak hial avang khan a hnam pumin an tawrh nasatzia kha rapthlak tak a ni. Hitler-an maktaduai ruk ngawt mai (Zoram mihring let ruk) a han ur hlum te kha sawiin a siak lo, an tawrhna zawng zawng kha sawi sen rual a ni lo. Kum 2000 lai ram nei lova, ram tin ram tanga tih darha an awm te kha, khang aia tawrhna nasa a awm thei chuang dawn em nit
Keini Mizo Kristian tam tak te pawh hian Pathianin Kristaa kan nihna a buatsaih peih diam(Eph.1:3-4) chu kan hai a, kan luah lova, chumi avanga kan tawrh nasatzia hi kan ngaihtuah chiang ngai emt Vanram kaina turin kan aiawha Krista thihna kan ring a, kan duh tawk der mai a. Kristaah sual kan thihsan ve tih thu erawh chu kan ngaihtuah lova, hre lo ang mai kan ni. Kristian niha, kohhrana tel ve hi kan duh tawk em em ringawt mai a ni. Chuvangin sual leh materialism hnehna nun kan nei lova, min hneh reng zawk mai a nih hi. Hei vang hian Kristian mi tam tak te chu eirukna, zuk leh hmuam, ruihtheih thil leh sex-ah insum kan tum lova. Inthlahdah takin kan nung a, kan tuhrah chhiatna nasa tak kan tuar a. HIV+ Aids leh cancer natna vangin kan thalaite an pul thi zawih zawih ta mai zawng a nih hi, a vanduai thlakin a manganthlak takzet a ni. Heng sualna te hi Sawrkar, NGO leh Kohhrante pawhin an do va, an do hneh thei si lova, engti fakauin nge kan la tawrh dawn tih pawh hriat phak a ni ta lo.
Chuvangin kohhran mite hi chuan Pathian lalram hi luhchilhin, i luah thuai thuai ang u. Chu dinhmun atang lo chuan Pathian thiltihtheihna kan hmang thei lova, rawngbawlna nung leh mi hneh theihna kan nei hek lo. Pathian rawng bawl inti ve si hian kan hahthlawn mai mai ang a, Pathian ngaih pawimawh ber thlarau bo man lovin, kut ruakin Pathian kan tawk mai dawn niin a lang. Chu ai chuan thlaraubo tam tak hruai chunga Pathian kan tawh theihna turin kan luah tur ram a buatsaih, Krista thihna tawmpuina nun hi i luah thuai thuai ang u.
7. Pathian lalram ka luah hunah zet chuan!
Hetia Pathian lalram I luah thuai ang u kan tih avang ngawt hi chuan, Thlarau Thianghlim a chet loh chuan, keimahni ngawt chuan engmah kan ang thei dawn lo tih kan sawi tawh a. Thlarau Thianghlim tawk che tur chuan duhna tak tak neia kan dil a tul tih kan sawi tawh bawk a. Mi malah mai ni lo , Kohhranah leh Politics ramah Pathian lalram a thlen a, kan luah theihna tur chuan SUAL SIM HARHNA RUNPUI kan ramah a thlen a ngai a. Chu chu a thlen theihna tur chuan kan ram lalber atangin kan vaiin inngaitlawma, tihtakzet a, kan hlawhtlin hma loh chuan beidawng hauh lova, Pathian kan dil a ngai a ni. Chutiang tak chuan hawh u, Pathian i au vang u.
Chu sual sim harhna runpui chu kan ramah a thlen a, Pathian lalram kan luah a nih loh chuan kan hmabak chu a eng lo khawp ang. Kan mizo zawlnei ten an hrilhlawk dan anga tawrhna nasa leh chhiatna rapthlak kan tuar hnu chauh va, Pathian lalram luah kan nih dawn chuan a hrehawm turzia sawi sen rual a ni lo vang. Chutiang Pathian lalram rorelna chu a tak takin lei mihring zingah a thleng thei dawn em ni kan ti mai thei. Fiji ramah a tak takin a thleng tawh a, kan awm danin a zir chuan kan ramah pawh a thlen theih lohna bik tur a awm hauh lo. Chutiang taka Pathian rolrelna, A lalna ram kan luah a nih ngai chuan, chumi hunah zet chuan ZORAMAH KHUA A VAR TAWH ANGA, ZORAM THAR KAN CHEN TAWH ANG. AMEN!