Pek chhan ang loa industry hmun hmantute cancel duh

Sawrkarin a pek chhan ang niloa industry ram leh hmunhma hmangtute chu an allotment cancel sak turin Mizoram Industries Association chuan thuneitute a ngen.
Mizoram Industries Association (MIA) thuchhuak chuan, Industrial Estate Zuangtui, Industrial Growth Centre Sakawrtuichhun leh Export Promotion Industrial Park Lengte ah sawrkarin a pek chhan ni loa hmang tam tak awmte chu an allotment cancel sakin dik taka hmang turte hnenah sawrkarin pe turin a ngen tih a sawi.
Commerce & Industries director post sawrkarin IAS cadre post atan a dah chu industry-a eizawngtuten harsatna tam tak an tawh phah thin avangin department mi ngei sawrkarin director-ah dah sak turin a ngen a. Commerce & Industries department-a post ruak tam tak awm hnawhkhah a nih loh avangin industry-a eizawngtuten an tuar mek tih sawiin, kum 2029-ah phei chuan officer tih tham an awm dawn loh avangin, post ruak tam tak hi a rang lamin sawrkarin hnawhkhah sak turin an ngen tih an sawi a ni.
Industry-a eizawngtuten state dang thiamna an zir theih nan sawrkarin study tour siamsak tur leh industry-a eizawngtute hmasawnnan sawrkarin industrial fare kumin chhunga siamsak turin an ngen tih an sawi bawk.