Pelicans in club record an siam

Nilaini zing khan NBA regular season 2023-24 khelh chhunzawm a ni a, New Orleans Pelicans chuan NBA game khata point an thawhchhuah hnem ber hun an tawng a, point 153-124 in an khingpui Utah Jazz an hneh. Nilai zinga inkhel hmuhnawm takah Los Angeles Clippers chuan an elpui lian Los Angeles Lakers an hneh.
New Orleans Pelicans hian an khingpui Utah Jazz lakah an khel tha viau a, quarter paliah chungnung zawkah an tang vek. Quarter tinah an chungnunna hmang hian point point 153 zet an thawkchhuak a, an khingpuite hi point 29 in an hneh. Jazz lakah point 153 an thawhchhuah hi NBA game khatah point an thawhchhuah tam ber a ni a, club record thar an siam. Pelicans hian NBA game khata point an thawhchhuah tam ber record hmasa chu kum 2018 khan a ni a, Sacramento Kings lakah point 149 an thawkchhuak a. He record hi nilaini zing khan point liin an rawn khum ta a ni.
Jazz lakah hnehna changa club record an siam tum hian New Orlean Pelicans tan CJ McCollum chuan point 33 a thawkchhuak a, Herbert Jones Jr-a’n point 22 a thawhchhuah bakah Brandon Ingram chuan point 18 a thawkchhuak ve bawk.
Nilaini zing hian inkhel hmuhnawm takah Oklahoma City Thunder chuan harsa takin an khingpui Portland Trail Blazers an hneh thei hram. Hun pangngaiah an inhnehtawk dawn emaw tih hnu; hun tawp nan second hnih vel chauh a awm tawh laiin Thunders player pawimawh Jalen Williams chuan point hnih pawimawh zet mai a thawkchhuak a. Point 111-109 in an khingpuite an hneh zui ta a ni. Thunders tan hian Shai Gilgeous-Alexander chuan point 33 a thawkchhuak a, assist vawi 10 a nei bawk.
Nilaini zingah LA Clippers an hmachhawn tumin LA Lakers player pawimawh LeBron James a inlan thei lova, Clippers lakah 127-116 in Lakers hi an tlawm zui. Inkhel dangah Denver Nuggets chuan point 114-109 in Indiana Pacers an hneh. He inkhelah hian Nikola Jokic chuan point 31 a thawkchhuak a, ball sawhlet vawi 13 a dawn bakah assist vawi 10 a nei tling bawk a season kal mekah a vawi 13-nan triple-double a puitling.