Pepe goal man a to

Pepe goal man a to
London club lian Arsenal chuan kum 2019 khan an club chanchina player manto ber ni turin Nicoas Pepe chu French Ligue 1 Lille atangin an la lut. £72m zet senga an lak luh Pepe hi a che tha lo viau a, Arsenal tan goal khat a thun hi a hlut zawng chu £2.7m anga chhut a ni.
Arsenal player manto ber a nih vangin a lakah beiseina sang tak a awm a, a laka pressure tam lutuk chu Pepe hian a zo lo a ni ber mai. Arsenal tan hian inelna hrangah hrangah vawi 112 a khel tawh a, goal 27 chauh thunin assist vawi 21 a nei tawl bawk. Arsenal tan a chet that ber tum chu 2020/21 season kha niin EPL-ah goal 10 a thun a, Europa League semi-final a hruai thleng bawk. Beisei a phak loh em vangin a tlatlum lo telh telh a, loan a tirhchhuah a ngai ta hial a, season liam ta khan loan in Nice a zawm. Nice a zawm theih hun chhung tawp tawh mah se Arsenal hian khelhtir tumna an nei tawh lova, khelhna hmun a chang phak lo leh zual tawh.
Kum 2019 -ah an player man to ber ni tura an lak luh Nicolas Pepe hi Arsenal player lak fuh loh ber a ni hialin a rinawm. A man a tam em em a, a hlawh chhe lo viau bawk. Chuti chung chuan innghahna ngam a ni lova, goal a thun hleihtheih loh bakah assist a ngah lo viau bawk. Beiseiawm taka inlan chang nei zauh thin mah se a daih rei lova, a zuih leh mai thin. A khelh tam theihna tur a pan thei a nih chuan atan ngei pawh a that zawk a rinawm a, hma a sawn theih zawk a rinawm.
Season tharah khawng zawka inlan tum Arsenal hian Pepe hi chhuahtir ngei an tum a. Sum senga lei duh an awm lo a nih pawhin free transfer-a chhuahtir dan tal an dap a, a contract tihtawp hial an tum. Gunners in chhuak tura an duh vangin amah pawhin club zawm tur a meh ve ruai bawk a, Besiktas nen an indawr mek a, an inlak luh theih mai a beiseiawm.