Pitar kum 81 miin dead hang record siam

Pitar kum 81 miin dead hang record siam
Kum 81 mi a ni tawh a, pitar a ni tawh. Pull up tih vela exercise la la zak zak thei hmel a pu tawh lo a, mahse, Bonnie Summer chuan kum 81 miin, dead hang record a siam a, minute 3 leh second 3 dead hang tiin, dead hang ti thei upa berah Guinness World Record-in an puang. A hmaa hetiang record chu Californian fitness influencer Annie Judis-i siam niin, ani hi kum 80 leh ni 244 mi a nihin minute 2 leh second khat a dead hang thei.
Dead hang chu chunglam bar khama ban pahnih hmanga in uai tan a ni mai a. Keiin lei a rap tur a ni lo a, zawi deuh hniangin, ban pahnih marin an uai thin. Han ti ve chhin la, minute eng zat ngei dead ang ve theih le.
Bonnie Summer hian July 2024 khan dead hang hi taksa tana a thatna chi hrang hrang an ziah a chhiar fuh a, chuta tang chuan a tuipui ta a. An veng gym-a a tih hmasak ber tum chuan second 21 chiah a dead hang thei. Tichuan ngawrh takin a bei tlauh tlauh a, nikum February thla kha chuan minute 2 leh second khat a dead hang ve thei ta.
A duhtawk mai lo, a inzir zel a. Mipain dead hang record a siam thlalak a hmu fuh a, hmeichhe lama record siamtuin engzat nge a tih theih ang le, tih a ngaihtuah ta a, “Ka kum rualpui zinga Guinness World Record a awm leh awm loh ka ngaihven ta a ni,” a ti.
Bonnie hian kum 81 a tlin hun a nghak ta char char a, kumin January ni 5 khan a tling ta chiah a, record siam turin a thawk chhuak ta a ni. A practice session-ah chuan minute 2 leh second 45 a ti thei thin a, mahse, record siam tura a tak tak a a an beih takah chuan minute 3 leh second 3 a dead hang thei ta a ni.