Thawhtan zing khan Eastern Conference a miten NBA play-off an khel tam. Play-off game khatnaah conference top seed Boston Celtics chuan Miami Heat an neh. Inkhel dangah Los Angeles Clippers chu Dallas Mavericks lakah harsa takin an chak ve bawk.
Regular season-ah Eastern Conference champion Boston Celtics hian play-in atanga play-off khel phak hram Miami Heat lakah an khel tha viau a, quarter hnuhnung berah an hnufual ve zeuh tih loh chu quarter hmasa pathumah chungnung zawkah an tang vek. Quarer khatnaah point ngain an chungnung a, quarter hnihnaah point 10 zeta chungnung zui lehin, point 15 ngawta hmahruai chungin chawlhlawk an hmang.
Chawlhlawk hnu lamah Celtics an khel tha chhunzawm a, quarter thumnaah point 17 zetin an chungnung leh a, quarter hnuhnung ber an khelh dawn meuh chuan point 32 zetin an sang fal der tawh. Point 32 zeta hmahruai tawh an nih vangin quarter linaah an player thate an hahchawlhtir a, hahdam zawkin an inlan. Quarter hnuhnung berah hian point 12 in Miami Heat chungnung bawk mah se an khingpui Boston Celtics lakah hian point 20 zetin an tlawm ta tho a ni.
Point 114-97 a Miami Heat an hneh tum hian Celtics tan Jayson Tatum chuan point 23 a thawkchhuak a, ball sawhlet vawi 10 a dawn tlin bakah assist vawi 10 a nei a, treble-double a puitlin. Miami Heat lakah hian Celtics player te an khel tha tlang viau a, player paruk ngawtin point 10 chin chung lam an thawkchhuak.
Thawhtan zinga inkhel hmuhnawm takah Los Angeles Clippers chuan an khingpui Dallas Mavericks chu point 109-97 in an hneh a, harsa takin hnehna an chang. Mavericks an hneh tum hian Clippers player pawimawh James Harden chuan point 28 a thawkchhuak. Clippers tan Luka Doncic leh Kyrie Irving te khel tha viau mah se hnehna chang tur khawpin an team an tanpui zo lo.
Get real time updates directly on you device, subscribe now.
Prev Post