PM Modi an nakumah report card pe ang ti

Kum 2024 inthlanpui hmaa Red Fort atanga Independence Day thuchah a sawi hnuhnung berah Prime Minister Narendra Modi chuan nakumah thuneihna chan leh ngei a tum thu sawiin kum 2014 khan ‘change’ tiama thlan tlin an nih thu sawiin a sorkar ‘performance’ tha avangin kum 2019-ah thlan tlin nawn leh a nih thu a sawi a. Kum 2024-ah chuan Red Fort atangin a hlawhtlinna report card a pek tur thu a sawi.
“Nakum August 15-ah chuan he Red Fort atang ngei hian kan ram hlawhtlinna chungchang ka sawi tawh ang a, kan mite theihna leh hlawhtlinna leh self-confidence te ka sawi tawh ang,” tiin Prime Minister Modi chuan minute 89 chhung kum 10 chhunga a thusawi rei ber pali-naah a sawi a.
“Ka sorkarin project lungphum a phum tawhte leh hawnna a neih tawh te in hmu ang a, kumina project kan kalpui apiang te leh hawn tawh te tarlan a ni ang,” tiin a sawi.
PM Modi chuan a term lehah chuan India chu khawvela economy lian ber pathumna a nih tawh tur thu ‘a chiang’ tia sawi bawkin nakumah thuneihna a chan leh ngei inringtawk takin a sawi a ni.
Indians te chu ‘ka chhungkua te’ tia sawiin ramin hma a sawn zel nan thil pathum hnawl a ngai a ti a. Chungte chu – eirukna, politics a dynasty leh mi tihlawm politics tiin a sawi a. Ram pum chu family member tia sawi bawkin Prime Minister Modi chuan amah chu mipui zinga pakhat inti bawkin dynasty based party te induhsakna uchuak chuan anmahni chhungkua tihlen zel bak an ngaihtuah lo a ti bawk.

Manipur
Parliament-a no confidence motion neih laia a thusawi chu sawi nawn lehin chi leh hnam anga intihbuainain a tuam mek Manipur chu ramin a thlawp tlat thu a sawi bawk a.
“North East-ah a bik takin Manipur-ah tharumthawhna nasa tak a thleng mek a, mi tam takin nunna an chan a, kan nu leh farnute chu zah lo takin an awm a ni,” tiin a sawi a. Mahse, tun hnai karah te hmasawnna a awm tia sawiin remna lam hawi chanchinthar a awm thu a sawi bawk a. Central leh State sorkar te chuan buaina chingfela remna a awm theih nan hma an la mek tiin a sawi bawk.

Hmalakna thar
A sorkar hmalakna thar a sawiah Prime Minister Modi chuan interest rate tanpuina chu khawpuia mirethei tena chenna In an lei theih nan thla thara tlangzarh tur Vishwakarma Yojana hmanga puih an ni ang a ti a, traditional skill leh crafts lam thiam tena an thiamna an tihpun zel theih nan cheng vaibelchhe 1,300 – 1,500 dah a nih thu a sawi bawk.
Hei bakah hian women in Self Help Groups (SHGs) programme hnuaiah drone te repair na lam thiam tura zirtir tur niin chungte chu agricultural work-ah hman a ni ang a ti bawk a. “Unaute a tlem berah Rs 1 lakh nei vaibelchhe hnih neih kan tum bawk” tiin a sawi bawk a. Jan Aushadhi Kendras pawh 10,000 atanga 25,000 ah tihpun a ni ang a ti bawk.

New World Order, millennium of rejuvenation
India chakna ber chu demography, democracy leh diversity pathum te a ni tia sawiin Prime Minister chuan thalaite tan a sorkar chuan skilling programme kalpuiin hei bakah hian working professional te tan pawha an thawh thu a sawi a, chungte chuan India chu kum 1,000 lo la awm turah a siamtharna lamah bulthut a siam dawn a ni tiin a sawi bawk.
India main economic power chu Tier 2 leh Tier 3 town te atanga chhuak tur tia sawi bawkin middle class te chuan India chu developed nation ah kum 2047 ah a hlangkai dawn a, chu mi kum chu India freedom kum 100-na a ni chiah ang, a ti bawk.
Fimkhur ngaihna sawi bawkin kum 1,000-1,200 kalta vel khan India chuan beih tawkin lal tenau pakhat hneha awmin nghawng a neih thui dan tur kan hre lo va, kha vang khan kum 1,000 vel sal thangah kan awk a ni, tiin a sawi bawk.
“Thil dang a awm lo, India ah confidence thar a piang mek” tiin a sawi bawk.
A sorkar work culture chungchang sawiin mipuite chuan reform siam tura an tihchak thu sawiin a sorkar leh bureaucrats te chu danglamna siam tura thawk tura turin an awm, a ti bawk a. Entir nan anti-Covid vaccine 200 crore dosages pek chu a sorkar hnathawh chak dan sawi nan a hmang bawk.
Covid pandemic avangin ram tam takin inflation, thil man sang leh supply chain buai an tawk a ti a. India chu pandemic avangin ‘khawvel thian’ a ni ta tia sawi bawkin climate change, renewable energy lamah te khawvel huapa ngelnghehna thlentu a ni, a ti bawk a.
“Khawvel huapa hmalakna kal zelah India in ‘one world, one sun’ tih te ‘one world, one grid’ tia solar alliance chungchang a sawi te chuan thlawp a hlawh a ni,” tiin a sawi bawk.