Pneumonia leng palh theiah inralring

China rama pneumonia hrileng mek leh he hrileng laka Mizoram a him theihna tura hmalak tulte sawi hoin Nilaini khan Health & Family Welfare principal secretary Esther Lalruatkimi, special secretary Vinay Kumar, principal director Dr Vanlalsawma bakah department hotute an thukhawm.
Health principal secretary chuan China rama pneumonia leng vanga nausen thi an awm thu sawiin, sawrkar laipuia Ministry of Health & Family Welfare-in a tul anga inpuahchah tura hriattirna a tihchhuah avangin lo inbuatsaih a ngai tih a sawi a. Ministry atanga lehkha rawn kalah pawh tun dinhmunah chiai na tur a awm loh thu tarlan a nih angin, mipui chiai lo turin a chah.
Hmalam hun hriatlawk a nih loh avangin phak tawk china inbuatsaih a pawimawh a. Covid hrilen laia inkaihhruaina dante kha fimkhur thilah zawm tur chin ngaihtuah a, health sector-a thawktute dinhmun leh damdawi, hmanraw neihte inhrechiang tura hriattirna dawn a nih thu a sawi a ni.
Health department hotute chuan China rama pneumonia hrileng chu zirchian mek a ni tih an sawi a. Tun dinhmunah India ram tan hlauhthawn tur a awm rih lo nia a lan rualin, inthlahdah chuang loa ram chhung, a bikin Mizoram hnaih state hrang hrang dinhmun thlithlai reng a tul tih an sawi.
Thutkhawmah hian Health department hnuai thawktu hrang hrang dinhmun bakah damdawi in hrang hrang, hmanraw neih leh damdawi kawl mek dinhmun sawiho a ni a, a tul anga inthuam chak dan tur rel a ni.