Chawlhlawk hma minute nga la awmah Pierre-Emerick Aubameyang a tihtluk avangin defender Lopes Beraldo hnawhchhuah ni mah se Paris Saint-Germain FC chuan Pathianni zanah sihnih faiin mualneitu Marseille an hneh a, table-a an hmahruaina sawhnghet zelin, anmahni hnaihbertu Brest nena an inthlauhna chu point 12 a ni chhunzawm zel.
Stade Velodrome inkhela PSG goal hmasa zawk hi second half tir lam minute 53-a Vitinha tihluh niin, hun pangngai tawp hma minute nga la awmah substitute Goncalo Ramos chuan mikhual goal hnihna a thawh ve leh a; season kal laia league goal 24 khawl tling tawh chunga Ligue 1 top scorer ni mek Kylian Mbappe chuan a hminga ziahluh goal lawm tur a nei lo.
PSG captain Mbappe hian kumin nipui insuan hun hawn rualin Real Madrid a zawm dawn a; an superstar tel loa nun hman dan an lo thiam lawk theihna’n bench lamah thuttir a ni chho ta zauh zauh a, Pathianni zan inkhelah pawh second half tir lam minute 63-ah khelmual atanga lakchhuah a ni.
Jean-Louis Gasset-a team Marseille kha an home game hnuhnung 19-a tlawm nei lo an ni ve a, mahse, minute 50 chuang player pakhata tam zawk ni chunga khel chungin mikhual palian lakah point khat pawh an hlawhchhuak zo ta lo a ni.
Reigning champion PSG khan league khelh sarih la awmah Ligue 1 title an kawl lai humhim turin point 10 chiah an mamawh tawh.
Point 12-a kal fal tawh PSG
Get real time updates directly on you device, subscribe now.
Prev Post
Next Post