Police Beat Post hawng

Hnahlan Police Beat Post ruahman thar chu Inrinni khan Champhai North bialtu MLA Dr ZR Thiamsanga chuan a hawng.
He Police Beat Post hian khaw 9 – Hnahlan, Khuangphah, Vaikhawtlang, Vapar, N.Diltlang, Murlen, Tualcheng, Lungphunlian leh Selam a huam a. Hnahlan chu ‘free movement regime’ hnuaiah Myanmar leh India khua leh tuite luh leh chhuahna hmun, entry and exit point atan sawrkarin a ruat tih MLA hian a sawi.
He Beat Post ruahman thar hi Hnahlan leh a chhehvel khuate himna leh kawng hrang hranga hmasawn zelna kawngah ruhrel pawimawh leh hmasawnna ropui tak a ni tih a sawi a. Hnahlan Police Beat Post-a thawktute chu an mawhphurhna tha taka hlen tur leh khawtlang mipui tana innghahna ngam nia tan la turin a chah. Hun lo kal zel turah Police Station puitling ni theia hma lak chhoh a tum thu a sawi a ni.