Police-in honeymoon hmang inthahna titua puhte la kawl dawn
Shillong court chuan Ningani khan thla hmasaa Indore sumdawng, Raja Raghuvanshi-a thattua puh, Sonam Raghuvanshi leh a bialpa nia sawi, Raj Kushwaha te chu police-in kawl an dil belh angin ni hnih dang kawl leh a phalsak.
Sumdawng thattu mi pathum – Vishal Chauhan, Anand Kurmi leh Akash Thakur te pawh judicial custody-ah ni 14 la awm zui turin public prosecutor T Chanda chuan a ti tih court complex-a thuthar lakhawmtuten an kawmnaah a sawi.
Chanda hian heng mi pangate hi Ningani tlai khan sessions court-ah a hmaa police kuta ni riat awm tura tihna a tawp rualin damdawi ina endik an nih hnuah inlantir an ni tih a sawi.
Heng mi pangate hi June 2-a Weisawdong Falls bul kurunga a ruang hmuh, kum 29 mi, Raghuvanshi-a thattua puha man an ni a. Hemi hma, May 23 khan a nupui kum 24 mi, Sonam nen Sohra-a honeymoon an hmanna atangin an bo a ni.
Sonam-i hi a pasal ruang an hmuh hnuah pawh a chin hriat lohvin a awm reng a, June 9 khan Uttar Pradesh-a Ghazipur-ah a inpe ta a. A bialpa nia sawi, Kushwaha leh a pasal thattu tura a tirh nia a sawi mipa pathum man zui an ni.
East Khasi Hills district Superintendent of Police (SP) Vivek Syiem-a chuan Sonam leh Kushwaha te hi inthahna thlengah zawh tur an la neih avangin ni hnih dang kawl an la duh tih a sawi a. “Kan team pawh Indore-ah anb la awm a. Thil thar a awm zel a, police team zin mek atanga thu kan hmuh zulin an pahnih hian thu zawh theih tam tak a awm a. A tul a nih chuan kan kawl zel pawh a la ngai ang,” a ti.
Sonam-i hian a pasal thah a nih lai hian phone pathum a keng a, pahnih a tichhia niin a sawi a. “Phone dang pakhat leh a pasalin tlereuh a inbel, a laksak takte kan la zawng mek a. A thah hnua Indore-a a awmnaah chuan kan hmu lo va. CCTV footage enin mi dang kutah a hlan em tih kan chhui leh mek a. A awmna ina bungrua la chhuak vekin a ruakin kan hmu a ni,” a ti.
Thawhlehni khan chhuitute hian Shillong atanga km 50-a hla, Raghuvanshi-a thahna hmunah hian mi man pangate hi hruaiin an chet dan tihnawntir leh an ni a. Hetah hian Chauhan, Kurmi leh Thakur te hian an pathumin machete pahnihin an bei tih a lang.
Machete pakhat, a fawng steel chu Raghuvanshi-a ruang an hmuhna bulah hian an chhar niin police chuan an sawi.
Nilaini khanSyiem-a chuan Raghuvanshi-a khan hnek vawi thum a tawk a, Chauhan-a’n hnek hmasa berin Kurmi-a’n a dawt a, Thakur-a a hnuhnung ber niin a sawi.
Police chuan Sonam-i hian inthahna kha ama ruahman vekah a pawm niin an sawi a. “A vai khan Indore-ah ruahman vek a ni a. Raghuvanshi-a nena an inneih hma lawk, February-ah khan niin Kushwaha nen an duang a ni,” tiin Syiem-a hian June 13 khan thuthar lakhawmtute a hrilh.
Police chuan an nupa hian May 20-ah Guwahati-a Kamakhya Temple an tlawh a, a kutthlaktu pathum hian May 19-ah khawpui hi an thleng ve thung a. Guwahati-a inthah chu a rem loh avangin Shillong an pan a, Sohra-ah an kal ta zel niin an sawi.
“Sohra bula Nongriat-ah an inhmu khawm a, Weisawdong Falls an pan ta a. Falls-a lirthei hunna hmunah pawh May 23 khan Sonam-i awm laiin an tibuai tawh,” tiin SP chuan a sawi.
Police chuan heng mite hi hlawh neia that tura rawihte niin an hria a, an thu zawh fiahnaah pawh Kushwaha-a tirh angin an insawi.
Get real time updates directly on you device, subscribe now.