Police-in VHP leh Bajrang Dal hruaitute lakah thubuai siam

Police-in VHP leh Bajrang Dal hruaitute lakah thubuai siam
Maharashtra-a Nagpur Police-te chuan Mughal emperor Aurangzeb-a thlan tihbo an duhna lantirnaah sakhaw inhuatna thil tia puh an an nih avangin Vishwa Hindu Parishad (VHP) leh Bajrang Dal office-bearer thenkhat lakah thubuai a ziak lut.
FIR hi Ganeshpeth Police Station-ah Govind Shende, VHP secretary in-charge Maharashtra & Goa leh mi dangte lakah ziah luh a ni tih police chuan an sawi.
Thawhtanni zan dar 07:30 vel khan Nagpur laili, Mahal-a Chitnis Park-ah VHP-in Chhatrapati Sambhajinagar district-a Aurangzeb-a thlan tihbo duhna an lantir laiin an sakhaw lehkhabu thianghlim hal a ni tih thu a than hnuah tharum thawhna a thleng zui a. Police-te chu lungin nasa takin an vawm.
Punkhawm zawh hnuah hian thubuai siam niin sakhaw inhuatna thlen thei thila chea puh an ni a. FIR ziah luh nghal a ni.
FIR-ah hian VHP leh Bajrang Dal office-bearer zingah Amol Thakre, Dr Mahajan, Tayani, Rajat Puri, Sushil, Vrushabh Arkhel, Shubham leh Mukesh Barapatre te hming lang telin Bharatiya Nyaya Sanhita (BNS) tlawhchhana thubuai siamsak an ni a, tumah man an ni lo thung.
Thawhtanni zana Maharashtra chhak lam khawpuia buaina a chhuah hnuah Thawhlehni zing dar 04:30 vel atangin curfew puan zui a ni a. Curfew hian Kotwali, Ganeshpeth leh Lakadganj huamin ni tin mamawh thil vel chauh chet phal a ni.
Khawpuiah hian hmun relti zual 11-ah venhim hna thawktute an patrol a, checkpoint siam a ni bawk.
Dan leh thupek kenkawh vil turin Quick Response Teams & Riot Control Police chu hmun hrang hrangah inrintir niin buaina chhuahna hmunah barricade siam a ni bawk a. Curfew puannaah hian dawr pawh khar vek a ni.
A hmain VHP hian Aurangzeb-a chawimawina ang chi chu an duh lo tawp tih an sawi a, Nagpur-a tharum thawhna thleng pawh ruahman lawk niin an sawi.
VHP Vidarbha Prant Sah Mantri Devesh Mishra chuan thuneitute chuan buaina siamtute chu na takin a hrem ngei tur a ni a, National Security Act (NSA) pawh hman tur a nih thu thuthar lakhawmtute hnenah a sawi.
Thu thianghlim hal nia sawi, tharum thawhna intanna bul pawh engmah a thlen loh thu a sawi bawk.