Police short course training…

“Police dinhmun zahawma siam turin, fitness tha neih a ngai a. Fitness tha nei turin, officer senior ber ber-te pawh huam vekin, short course training buatsaih tum a ni”.
Hei hi tun hnaiah home minister K.Sapdanga’n a sawi a. “Mipui rin ngam leh thlamuanpui tling turin Mizoram Police siam thar tuma ngawrh taka thawh mek a ni,” a ti bawk.
Kan hria a, sipai/police tling tur hian tehna hrang hrang a awm a, chung zinga a pawimawh zual chu ‘taksa hrisel tha leh chak’ hi a ni. Chutih laiin, kum khat chhunga Mizoram police thi zat hi 100 te an tling thin nia sawi a ni a, hei hi a pawi hle a ni.
Police-te hi ram venhimna hna hrang hrang thawk tur an nih avangin mi pangngai aia hrisel leh chak, buaina leh harsatna a thlen chang pawha rang tak leh remhre taka che zung zung thei tura ngaih leh beisei an ni. Police lak (police recruitment) a nih dawn pawhin, heng theihna hrang hrangte hi tehfunga hman a ni a. Chutianga mi bik rual awm khawmte chu eng lai pawha che chhuak thei reng tura inbuatsaih a ngaih avangin, eng lai pawhin taksa sawizawi neiin, ei leh in pawh a tha tha, hlawh pawh tha tak pek an ni a; sawrkar hnathawk dangte aiin hlawh pawh an la tam a, thla 13 hlawh pek an ni nghe nghe.
Tunhma deuh te kha chuan, zing vartianah sipai leh police insawizawite hi khawchhung kawngpui dungah an tlan ri thup thup thin kha a ni a, mipui pawhin kan thlamuanpui thin a ni. Tunah hi chuan, physical training-na hmun bik te an lo nei tha ta deuh a ni ang a, mipuiin kan hmu phak ta lo.
Kum khat chhungin police 100 an thi thin a nih chuan, chawhrualin ni li danah Mizoramin police pakhat zel kan chán tihna a ni a, discipline tha tak hnuaia inenkawlna awm tura ngaih, hetiang zat police kan inhloh thin a nih chuan, inenfiah kan ngai hle a, insiamthat kan mamawh hle tihna a ni. Home minister-in siamthatna beihpui thlak a nih tur thu a sawi pawh hi, ramin a mamawh tak pawh a ni.
Mipui, nunau, khawtlang leh ram venghim tur, mipui thlamuanpui tham leh innghah ngamna ni zel turin Mizoram Police-te, han tang sauh sauh teh se. Training te pawh ‘short course’ mai ni lovin, ‘long course’ te pawh kan mamawh tawh hial ang chu!