Policy enkawltu tur leh project enpuitu tur Committee an thu

Mizoram sawrkarin Committee pahnih a din thar – State Policy Coordination Committee leh State Project Monitoring Committee chu Ningani khan a hran ve ve in an chairman, chief minister Lalduhoma hoin an thukhawm a, an hnathawh dan tur an rel.
Policy Coordination Committee hnathawh ber tur chu, Hand Holding Policy enkawl a ni tih chief minister hian a sawi a. A kaihhnawih department-te hmalakna a tul angin an enpui anga, thurawn pek leh hmalakna kal kawppui theih chi, central lama funding source zawn belh thlengin an thawk dawn tih a sawi.
“Mithiam ber ber thlankhawm in ni a, hnathawh dan awlsam leh rang, rintlak si hmanga sawrkar policy pui ber hi kalpui tum ila, theihtawp kan chhuah dawn nia,” tiin member-te a chah.
Committee vice chairman, adviser to CM Dr KC Malsawmzauva chuan hmalak dan tur tlangpui a sawifiah a. Thil pawimawh hrang hrang relin concern department tur an thlang a, a rang lama thutkhawm pui nise an ti.
Mizoram sawrkar hian Hand Holding Policy atan sawrkar kumthar budget-ah cheng vaibelchhe 200 a dah a, kumin hi Year of Consolidation a nih avangin pilot project angin kalpui phawt tur a ni.