Polling station 35 siam belh dawn

Polling station 35 siam belh dawn
Aizawl district-ah polling station 35 siam belh a ni dawn a. Polling station-a voter thenkhat chu PS dangah sawn an ni bawk.
District election officer Aizawl Er Lalhriatpuia kaihhruaiin Ningani khan District Level Standing Committee on Rationalization of Polling Station Aizawl an thukhawm a. Election Commission of India-in voter-te tana remchan zawkna ngaihtuahin, voter 1200 aia tam awmna polling station, polling station pahniha then (polling station thar siam belh) tura thupek a chhuah bawhzuiin DEO office Aizawl hmalaknaa polling station thar 35 siam belh tura rawtna siam chu pharh a ni a, DLSC hian lungrual takin he rawtna hi a pawmpui.
Aizawl district-ah hian voter 1200 aia tam awmna PS 35 a awm avangin, PS thar 35 siam belh tur a ni a. A thar siam tur hi a veng chhunga political party leh tlawmngai pawl hriatpui leh pawmpuiin, AERO leh BLO ten a hmuna an enfiah vek hnuah rawtna siam a ni.
Polling station thar 35 siam belh bakah hian polling station thar siam belh loa, voter siksawi remchanna Zemabawk-II leh Bethlehem Vengthlang-I hnuaia polling station-a voter thenkhat chu Zemabawk-V& VI ah sawn an ni dawn a. ITI Veng-I & II hnuaia PS pahnih YMA Community Hall ami chu ITI Block-II a sawn a ni dawn bawk.