Pro Fight milian pahnih Biakkima vs Dinsanga!

Pro Fight milian pahnih Biakkima vs Dinsanga!
Tata SK 612 LPS Pro Fight-ah vawiruk champion hmasa ber nih tumin NT Lalbiakkima a tel dawn a, tute pawh a hmaah ding dawn se harsatna a nei lo tih a sawi.
Kum 27 mi Biakkima hian hming pek theih ni hnuhnung ber vawiin, Nilaini hian lehkha a thehlut dawn a, flyweight kg 48 atanga kg 52 inkarah champion kawnghren lakir turin a tel dawn tih a sawi nawn leh.
Fly champion lai Laldinsanga’n application form a thehlut tawh a, nikum khan Pro Fight title a lak hnuah weight rit zawk bantam-ah a khel zui a, chutih laiin Mizo boxer langsar leh thawm nei lian tak Biakkima nena intawn theih a duh hle a, a tan tawnhriat pawimawh tak a ni dawn tih a sawi ve bawk.
Kum 2014 khan kum 18 mi niin a vawikhatna’n Pro Fight-ah New Siaha boxer Biakkima a tel a, lightfly-ah champion-in, kum 2019 thlengin vawinga a champion zawn a, nikumah awlin, kuminah tha tharin a kir leh dawn a, a vanglai a hmang tan chauh tih a sawi.
Tunlai Mizo boxer chhuak thar zinga tha ber pawl leh kum 2022 best boxer, kum 20 mi Dinsanga nena intawng dawn pawh ni se harsatna a neih loh thu a sawi a, Pro Fight chanchina vawiruk champion hmasa ber nih tumin a inpuahchah ngawrh hle a ni.
Zo Keite chuan, “Dinsanga maw? An la naupang a, ani nena intawng turin eng harsatna mah ka nei lo. Amah pumpelh tum ang zawngin rilru ka pu lo hrim hrim,” a ti.
Kum 2009 atangin Pro Fight kalpui a ni a, weight hrang hrangah boxer hrang 23 an champion tawh a, Biakkima leh Tuipui chhuanvawr HC Johnkenty Vanhlimpuia’n tum nga ve ve title la tawhin an bitum apiang an la hneh vek a, champion ngun ber an ni dun mek a ni.
Tata SK 612 LPS Pro Fight-ah Indian Navy boxer Vana’n tel a tum lo a, mahse, title fight rualin professional boxing a luhchilh theihna kawng hawnsak a ni ang.
Chutih laiin Biakkima’n champion kawnghren hren leh ngei a tumna a tihlawhtling a nih chuan Vana nena hnuhma inang an neih kalsanin mimalin champion hnem ber a ni dawn a ni.
Pro Fight-a tel tur tan Nilaini thleng hming pek theih a ni a, nimin tlai thleng khan boxer 370 chuangin lehkha an thehlut tawh.