Pro Volleyball League season 7
April ni 23 khian LPS Arena, Falkland Vengah Pro Volleyball League vawisarihna khelh tan a ni dawn a, May ni 31-ah mipa final hmangin khar a ni ang.
Inrinni khan LPS Vision Director Lalsawmliana Pachuau office, Zarkawtah LPS aiawh leh Mizoram Volleyball Association hruaitute’n inremna siam felin, a hma aia changtlung leh hmasawn zawka kalpui tumin ruahmanna duanchhuah a ni.
Mizoram Volleyball hruaitute chuan LPS nen thawkduna Pro Volleyball vawiruk an buatsaih tawhah Mizo player-te’n hma an sawn phah hle tih an sawi a; tunhnai maia zawk fel tak North East Olympic Games volleyball-ah chiang takin Mizoram mipa team an champion a, Pro Volleyball rahchhuah hlawhtlinna niin an ngai.
April ni 23, Thawhlehni zanah khel tanin, vawikhat theuh mipa team ruk leh hmeichhe team nga an inkhelh kual hnua a sang paliin semi-final an lut ang. May ni 30, Ningani zanah hmeichhe final a ni ang a, May ni 31, Zirtawpni zanah mipa final hmangin championship hmawrbawk a ni ang.
Mipa lamah champion lai Thutak Nunpuitu Team, vawihnih champion tawh Hunthar, 2022 champion Durtlang North, 2019 champion Chhinga Veng Spikers, Tuichangral leh kai thar Hlimen an inel dawn a; hmeichhe lamah champion lai Luangmual, 2019 champion Durtlang, Bungkawn, kai thar pahnih Serkawn Lunglei leh Diakkawn Kolasib an inel ve thung ang.
Mizoram volleyball inelna sang ber hi a vawikhatna’n LPS Arena-ah khelh a ni dawn a, ni 39 chhung awh tur niin, mipa inkhel 18 leh hmeichhia 13, a vaiin inkhel tum 31 a awm dawn a ni.
Hlawhtling takin championship hnuhnung ber khar a ni a; June ni 30, 2023 khan final-ah TNT-in 3-2-in Hunthar an hneh. A vawikhatna’n Pro Volleyball champion an nih rualin Mizo hlanga mipa champion ni thei hmasa ber an ni a; Vanlaltanchhana’n player tha ber leh spiker tha ber chawimawina a dawng a nih kha.
June ni 29, 2023-ah hmeichhe final khelh a ni ve thung a; Luangmualin 3-0-in Kanan an hneh.
Pro Volleyball-a an tel hmasak berah Luangmual champion nghalin, Gujarat atanga an lakluh Nipa Barad chuan a thawhhlawk hle a ni.