Project Monitoring

Mizoram State Project Monitoring Committee (MSPMC) Annual Report 2024-2025 chu tun tum Assembly Session-ah hian House-ah pharh a ni a; hetiang report hmuh tur a awm ve ta hi hmasawnna rahbi thar zinga chhiar tel theih a ni awm e.
MSPMC hian kum khat chhungin project 47 an endik a, chumi awmzia chu, thla tin project pali (3.9) zel; chu chu kar tin project pakhat an endik tihna a ni.
Tun hi MSPMC bul tanna a nih avangin, monitoring committee din hmaa project awmsa lo thawh tawhte, project lungphum atanga hmuhpui loh te a ni tlangpuiin a rinawm. Project hna thawktuten bul an tan tha em tih lam chu sawi tur an hre vakin a rinawm loh a. Tuna an tih theih chin chu, project hna kal laiah thawktu (contractor) ten kut an thlak dan a tha tawk em, an hmanrua hmante a dik em, thawh zawh hun turah an thawk zo thei dawn em etc. tih te an endik thin ang a, a tul angin contractor-te harsatna chinfelpui te pawh a ngai maithei. ‘Tun aia tha zawkin thawk rawh u’ tih te, ‘thawk chak deuh teh u’ tih te, hnathawktute nawr tur committee a han awm hrim hrim te pawh hian awmzia chu a nei dawn tih a hriat a ni.
Tuna MSPMC endik zingah hian Aizawl City Centre Annexe, New Market Aizawl hi buaipui chhung a rei ta hle a. MSPMC annual report-a tarlan a nih dan chuan, building hlui thiah chhung nghah a ngaih avangin hna hi January 2023-ah tan a ni, tih a ni. Zawh hun tura bituk chu 31st January 2024 tih a ni a, chuti chung chuan tunah hian 75% vel thawk zo tawh anga tarlan a ni a, zawh hun tura bituk atanga kum khat chuang zet a ral hnuah pawh 75% vel an la thawk leih leih chauh tihna a ni.
Mihring tam tak eizawnna hmunpui tura ruahman hi, a hna quality lam a that leh a chhiat chu eng pawh ni se, zawh hun tur bituk hnu kum khat aia tam a ral leh tawh hnu pawha 25% thawh zawh loh a la awm ta cheu hi a zia lo hle a, mi tam tak eizawnna hrek behna a nih avangin, chak lehzuala thawk thei tura nawr nat ve deuh chu a ngai tih a lang awm e.
Monitoring hna thawk na na na chuan, project hna kal laite thawh dan a tha em, hmanrua cement, balu, rod etc. a dik em tih thlengin an endik vek dawn tih a hriat a, tunhmaa endik mumal lohva project hna lo thawh liam tam tak ai kha chuan project quality pawh a tha ang tih a rinawm.
MSPMC hi kum khat vel awrh chauha upa a la ni a, chuti chung chuan hna tam tak an thawk hman a, endik loha thawh liam ai chuan endikna hnuaia thawh project te chu an danglam ang tih a rinawm. Mipui lam pawhin project kal lai thawh dan hi monitoring committee kuta dah mai lovin, lo mitmeipui thei ila, hna tha lo nia kan hriatte lo report zung zung thin ila, kan tanrual phawt chuan hmasawnna tluantling kan nei ngei ang.