PU College-in India ram puma college tha 35-na nih an lawm
National Institutional Ranking Framework-in India rama college tha 35-naa a thlan Pachhunga University College chuan Zirtawpni khan an college hmunah an lawm a. Chief minister Lalduhoma leh Higher & Technical Education minister Dr Vanlalthlana ten an hmanpui.
India rama college tha thlan zinga tel PUC-in tun dinhmun a thlen theih nana beitute chungah chief minister hian lawmthu a sawi a. Mizoramah zirna tha zawk a awm theihnana a kaihhruai sawrkar ruahmanna tlangpui a sawi. “Hriselna leh zirna lama sum sen hi kan sawrkar chuan expenditure-ah kan ngai loa, investment a ni,” a ti.
Mizorama leilung hausakna kan neih hrang hrang chhawr tangkai turin geology lama thiamna sang nei kan mamawh tih sawiin, PU College-ah geology zirna a awm a, tang sauh sauh turin a chah.
“Thalaiten mahni kea dinga hna an thawh suau suau na ram siam turin skill development uar zel ila, Hand Holding Policy kan tan dawn hnai a, thawhpui tlak thalaite chu tumah thleibik nei loin cheng nuai 50 thleng loan awlsam an lak theihna, interest free ni bawk si kan chhawp dawn. Hetiang policy nei state awmchhun kan ni a. He hmalakna chhawr thei thalai, mahni kea ding tlak thiamna nei, thawhpui tlak lo buatsaih ula, tuna zirlaite pawhin chutiang mi chu rawn nih tum ang che u,” Lalduhoma hian a ti.
PUC principal Prof H Lalthanzara chuan, hun rei tak an lo beisei tawh PUC ram land lease tunhnaia sawrkarin a tihfel sak avangin lawmthu a sawi a. PUC-ah hian arts, science, commerce leh management stream zirna awmin, under graduate, post graduate leh Ph.D zirlai 2700 chuang an awm mek tih a sawi a ni.
National Institutional Ranking Framework hi:
* Sawrkar laipui Ministry of Education-in zirna in sangte that dan endiktu tura a thlan a ni.
* PU College hi kum 2018 khan a tel ve tan a, 101 leh 150 inkarah a awm. A hnuah pawh top 100 ah a kai mai loa, kum 2022 khan ram puma 45 na a tling chho a; kum 2023-ah 34-na, kuminah 35-na a ni. Kum thum chhung a zawnin top 50-a a lanna a ni.
* Kuminah hian India rama college 3371 an inel a, an zinga 182 hi hmarchhak ami a ni.
* NIRF-ah hian 100-na thleng rank pek a ni a, chumi thleng pha lote chu rank band 101-150, 151-200 leh 201-300 pek an ni. College malin rank an nei tawh lo. India hmarchhaka PUC hnaih bertu Patkai Christian College chu 101-150 rank band-ah a awm a, college hlun tak St. Anthony’s College chu rank band 201-300 ah a awm. An ni pahnih bakah Nowgong College (rank band 201-300) tih loh chu hmarchhakah lang pha an awm lo.