Public Sector Enterprise-te hi
Mizoram sawrkar hnuaia Public Sector Enterprise-te hi bul tanna tur sawrkar-in tum sakin, anmahni inenkawlna tur bakah sum leh paite thawk chhuaka sawrkar-a chhung lut tura beisei an ni a. Mahse, kum rei tak chhung chu sawrkar tana hlawkna lam aiin, a thawktute hlawh leh anmahni inenkawlna tur pawh thla tinin sawrkar atangin pek an ni a. State sum bawm hnawh puar tura din heng corporation-te hian kum tin state sum bawm an tithep reng zawk ta mai a ni.
Tun sawrkar term atana Legislative Assembly Session hnuhnung ber-ah khan Comptroller and Auditor General (C&AG) Report No.2 of 2023, House-a thehluhah khan, heng PSE parukte hi thawhchhuah nei lovin hlohin an kal char char a; ZIDCO erawh chuan kum 2020-21-ah profit 0.82 crore (nuai 82) leh kum 2021-22-ah profit 0.98 crore (nuai 98) an thawkchhuak niin tarlan a ni a. Chutih laiin profit siamtu awmchhun pawh hian dividends declare a la siam ta chuang lo niawm tak a ni.
Hetiang hi kan PSE-te dinhmun a ni a. Kum 2001 chho-ah khan C&AG Report chuan heng corporation-te siam tha tur leh, chu chu a harsa a nih chuan khar tura hma la turin thu a lo rawn tawh a. Cabinet pawhin a ngaihtuah a, thenkhat restructuring tur leh thenkhat khar (Closure) turin thutlukna a siam a. Thawktute pawh Early Retirement Rule 2015 hmanga chawlhtir an awm nual a nih kha.
Hun a lo kal zel a, heng PSE-te hian state economy siam that chu sawi loh, economy uai hniamtu a ni zawk ta hial a. State GDP-a an thawh (contribution) ve pawh 0.02 % te a ni a, a ngaihna a awm lo hle a. 2021-2022 chhunga PSE tana sawrkar hloh chu cheng vbch 56.28 (Cheng nuai 5628) a ni bawk.
Hei hi PSE-te dinhmun mek a nih avang hian sawrkar hian a siam that dan a zawn loh a, a tihtawp bawk si loh chuan, state sum bawm mawng pawp lian tak pakhat a ni reng dawn a, state rethei, leiba tam tak nei reng tan chuan chinfel thuai a pawimawh dawn hle a ni. Chutih rualin, PSE-te tihtawp (closure) ringawt hi chinfelnaa ngaih ngawt tur pawh a ni lo va, PSE-te hi kan ramin a mamawh mek a nih avangin hlawkpui ngeina tura restructure hi kan mamawh chu niin a lang.