PUC-ah HBC-ah inthlan kaihhnawih hun hmang

Pachhunga University College leh Govt Hrangbana College ah inthlan kaihhnawiha vote neite hriat tur inhrilh a ni.
PU College post graduate zirlai, Students Council leh Directorate of Election tangdun chuan Zirtawpni khan “Young Voters’ Education” leh ‘Political Talk’ an buatsaih a. Chawhma hun hi Young Voters’ Education programme atan hman a ni a. Election directorate atangin asst. commissioner Aizawl Lalchhanhimi’n “EVM, VVPAT leh Model Code of Conduct’ chungchang a sawi a. BDO Tlangnuam Jennifer Vanlalhruaii Pachuau chuan, ‘SVEEP leh IT application’ chungchang a sawi.
PUC principal Prof. H Lalthanzara chuan thu sawiin, ‘Ram leh hnam siamtha tak tak turin ram hruaitu tha, leader tha thlan a pawimawh,” a ti a. Zirlaite chu vote thlak vek turin a sawm a ni.
Chawhnu hunah Department of Economics zirtirtu Lalthlamuana Ralte kaihhruaiin Political Talk neih a ni a. Congress party aiawhin president Lalsawta, MNF aiawhin adviser Lalruatkiama, ZPM aiawhin consultant Dr Lalmalsawmzauva te an tel.
PU College-ah hian post graduate department panga – Mizo, Philosophy, Life Sciences, Geo-Physics leh Applied Mathematics and Statistics department a awm a, zirlai 104 an awm mek. PUC-ah hian doctor zir mek, Ph.D scholar 100 vel an awm bawk.
Zirtawpni vek khan google sponsor-in Department of Political Science, Govt. HBC chuan an zirlaite pualin MLA inthlan tur pualin Media Literacy Campaign an nei.
MZU Department of Mass Communications professor V Ratnamala chu resource person a ni a, kumina state 5-a MLA inthlan neih turah thalai vote nei tharte chuan media hman uluk a, chik taka chhiar zel a pawimawh tih sawiin, “Tunlaiah social media kan hmang nasa a, kan thil chhiar leh hmuhte ah dik lo leh fel lo a awm thei a, uluk leh chik takin enfiah zel a tha. A bikin inthlan dawn hnaihah phei chuan phuahchawp deuha thil kalpui a awm thei a, print leh visual media emaw internet site rintlakah check zel a tha,” a ti.