PUC Infotech Centre hawng

Pachhunga University College-a computer hmunpui tur, PUC Infotech Centre chu Thawhlehni khan Mizoram University finance officer Prof Vanlalchhawna’n a hawng.
PU College chu ram pum huap pawha college hming langtham a nih avangin tuna higher education kalphung inher danglam mekin a phut anga inpuahchah a, zirna in tha tak ni tura tan lak a ngai tih Prof Vanlalchhawna hian a sawi a. Hei hi PUC tan chuan Mizoram mipui laka a mawhphurhna ni hiala a ngaih thu a sawi.
Pu College principal Prof H Lalthanzara chuan PUC Infotech Centre atana hmalak dan a dinhmun a sawi a. Hetiang centre din a nih theih nana MZU-in sum leh paia tanpuina an pek avangin an lawm hle tih a sawi a ni.
PUC Infotech Centre-ah hian thil chi thum – GIS lab, Language lab leh Internet Resource Centre a awm dawn a. A vaiin computer 140 a awm ang. GIS lab hi geography, geology leh environmental science ten an hman tur a ni a; Language lab hi english zirlaite leh soft skill course hrang hranga zirlaite hman tangkai tur niin, Internet Resource Centre hi chu zirlai zawng zawngin internet kaltlanga an mamawh lak nan an hmang thei dawn a ni.
Infotech Centre hi computer base test (CBT) centre atana hman theih a ni nghal dawn a, online exam chi hrang hrang a tih theih anga, IT leh computer software lam training chi hrang hrang pawh neih theih tura ruahman a ni. He centre hi commerce zirlaiten an hman tangkai tura ruahman a ni bawk.
He centre atan hian Rs. 71,15,164 sen a ni a, PUC Academic Block V chungah a awm a ni.