Putin-a’n Hungary leh Czech run a dik lo ti
Russian President Vladimir Putin chuan Soviet-in Hungary leh Czechoslovakia a run kha a dik lo tiin a sawi.
Eastern Russia-a forum neihnaah foreign policy kalpuinaah mipuite duh dan lo anga kal chu thildik a ni thei lo tiin a sawi bawk a.
Hetih lai hian Russian sipaite chuan Ukraine-ah indona an la kalpui mek thung a.
Soviet union chuan kum 1956 khan Hungary a run a, kum 1968 khan lungawilohna nasa tak leh zalenna ngiata nasa taka kalpuina avangin Czechoslovakia chu a run leh bawk a ni.
President Putin chuan heng thu te hi eastern Russian City of Vladivostok a Eastern Economic Forum neihnaa a sawi a ni a.
Kum 1968 leh kum 1956 a Prague leh Budapest a run kha colonial power ang maia chetlakna a ni em tiin moderator chuan a zawt a.
Putin chuan, “Hun rei tak ata tawh kha thil kha Soviet policy tihsual a ni tih kan hria a, boruak duhawm lo zawk a thlen a ni. Tute mahin mipuite duh loh thil foreign policy an kalpui tur a ni lo,” tiin a sawi.
Putin chuan khawthlang ram te pawh a bik takin US chuan tunah hian Soviet in kan tihsual ang khan an tisual mek a ni tiin a sawi bawk a.
“An allies te an partners tia an kohah te pressure an pe a. |hian an nei lo, duh chauh an nei a ni. Hei hi mi tin hriat lar British formula an tih chu a ni,” tiin a sawi bawk.
Mahse Putin-an Hungary leh Czechoslovakia a Soviet chet dana a ngaihdan a sawi hi a inner circle thenkhatte thlir dan nen a inang lo thung.
August thla khan history textbook Putin adviser pakhat Vladimir Medinsky an a ziahah chuan 1956 Hungarian Revolution kha Khawthlang ram huaihawta facist uprising-in a hrin a ni a ti a, kum 1990 a Hungary atanga Soviet sipai hnuhkir kha tihsual a ni a ti ve thung.
He textbook hi Hungarian politician leh historians te chuan an sawisel nasa hle thung.
Szilard Demeter, director of the Petofi Literary Museum chuan ‘mihring lo lutuk dictatorship chu tute pawhin a tha zawngin sawi eng ang mahse sawi mawi theih a ni ngai dawn chuang lo’ tiin a sawi.
Hungarian Foreign Minister Péter Szijjártó chuan, “Hungarian history a kum 1956 Revolutionaries te kha kan hero te an ni,” tiin a sawi bawk.