Putin-a’n president term thar a chelh leh dawn

Russia leader Vladimir Putin chuan May 7 atangin kum ruk chhung atan Russian president nihna a chelh leh dawn a ni.
Kum 1999-a acting president a nih atang khan Putin chuan Russia chu her danglam vekin amah chauh chu thuneitu anga inchhuahin politics thila amah el pha turte chu rap bet vekin leh independent-minded journalist te pawh ram pawnah tlanchhe lo thei lova siamin chet a la a ni.
A thuneihna a turu em avangin Ukraine run chungchangah pawh khawvel ram dang ten an tei thei dawn lo tih leh hrekna nasa tak an tawk dawn tih official ten an hre reng chungin hnial ngam an awm lo va, chumi piah lamah Russian sipai sing tel ten nunna an chan phah tawh a ni.
Tunah thuneihna a pumhmawm leh dawn hnuah engtiang chiahin nge Vladimir Putin chuan chet a lak dawn tih chu inrinsiak mek a ni. Ukraine indona kal mek chu ngaihven ber tur pakhat niin Putin chuan inhnuhhniam emaw tumna reng a lantir bawk hek lo.
“Ukraine indona hi Putin-a political project pawimawh ber a ni mek a, engmah inthlak danglam a awm a ring lo va, chu chuan engkim a nghawng thung ang” tiin Brian Taylor, Syracuse University professor leh The Cod of Putinism tih lehkhabu ziak tu chuan Associated Press tena an interview-naah a sawi a.
Ukraine-a Russia indona
February thla khan Putin chuan thusawina a neihah Moscow in Ukraine a thil tum a neih chu a tihlawhtling dawn tia sawiin ‘kan sovereignty leh kan khua leh tui te him nan’ chuan eng pawh kan ti ang a ti. Russian sipai te chuan ram zau tak la tawhin kawng hrang hrangah hmasawnna an nei nasa a ni, a ti bawk.
Mahse chuvang chuan lehlamah hloh a awm tur thu sawiin ram chhunga project kalpuina tur te education reforms siamna tur te welfare lam leh retheihna sutkian nana sum hman tur te chu lakpenin a awm dawn lo thei lo tiin darkar hnih zet thusawina a neihah a sawi a.
Putin ngaihdan chuan Ukraine chu Russia ram niin engti kawng pawhin inla hrang thei lo niin Ukraine chu Russia thlazar hnuaia lut tur a ni tih a ni bur mai a ni.
Ukraine indona chu tun dinhmunah tawp pawh ni se, Russia chuan tuna Ukraine ram a chhuhsak mek te chu luah hlen a tum bur bawk a. Chutak chuan European ram te hlauh a ni thung a, Putin chuan Ukraine a awp a nih chuan a bak zel lak duhin Baltics emaw Poland te pawh a run leh duh mai an ring a ni.
“Putin hi a ambitious em avangin sum tam tak sengin Ukraine a hlawhtlinna a chang a nih ngat chuan hmun dang pawh lak tumin a bei leh duh ngei ang,” tiin Stephen Walt, Harvard international relations professor chuan journal Foreign Policy ah a ziak a. “Chutih rual chuan tuna Russia-in a ram lak chin bak chu a sum leh pai senso a turu em avangin lak belh zel tum lohna pawh nei thei tho a ni,” a ti a. “Thil chiang tak chu Ukraine indona a tawp hunah meuh chuan Russia chu indona hmachhawn leh mai thei dinhmunah a ding dawn chuang lo,” a ti bawk.
Mahse chutiang chu thleng lo thei tho a ni, tiin Maksim Samorukov, Carnegie Russia Eurasia Center chuan sawi thungin ‘Putin hi tih-âtin a awm tawh a, Moscow hi mahni leh mahni intichhe zel thei a ni’ tiin a sawi bawk.
Samorukov chuan Putin a kum upatna chuan a judgement pawh a khawih thei ti bawkin, “Kum 71 a ni tawh a, a kum upat tawhna chuan a thutlukna siamah awmze thuk tak a nei a ni. Hun nei rei tawh lova a inngaihna chuan chiang takin Ukraine run thutlukna a siam tir a ni,” tiin a sawi.

New Power dyanmics
A pumpuia lakin Putin chuan hun dang zawng aiin a thuneihna a sawhnghawt tawh lo zawk tia sawi a ni.
Russia nat theihna te chu hun dang zawng aia langtlang a ni tawh a, Kremlin chuan thutlukna a siamah reng reng thleibik nei ranin thil a kal vek tawh, tiin Samorukov chuan a sawi a.
“Russian political elite te chu Putin thupek kenkawh kawngah an nem tawh a, a khawvel thlir danah an zawmpui danah pawh an nem tawh a ni” a ti a. Putin refim chu zankhata tluchhe vek thei dinhmunah a ding reng tho va, kum sawm thum kaltaa Soviet tlukchhiat ang tho dinhmunah khan a ding reng a ti bawk.
Putin chuan Khawthlang ram te a ei lohna chu a kalpui zel dawn bawk a. February thlaa thusawina a neihah pawh khawvel ram dang danga an tih ang thovin Russia lakah pawh chetlak an duh a, kan ramah lungawilohna thlenin chhunglam atanga min tihchak loh an tum a ni, tiin Khawthlang ram te a demna a lo sawi tawh a ni.
Putin chuan Khawthlang ram te chu Ukraine an thlawpna avanga hua a nih ai mahin Russia moral fiber tihchhiat tuma a ngaihna chu a turu zawk bawk.

Kohhran leh opposition te
Nikum khan Russia chuan LGBTQ+ movement dan pawnah hnawlin extremist a ti a, Russian official te chuan Russian Orthodox Church te thlirna chu Western influence kal zelah dinchantir an tum thu an sawi bawk a, gender thlak pawh khap a ni bawk. Russian Orthodox Church chu Vladimir Putin thlawp bur an ni bawk a.
Vladimir Putin kaihhruaina hnuaiah Russia rama opposition leh independent media an awm lo tluka ngaih a ni a, Putin chuan Russia information space chu nasa zawka a thunun zui rin niin chumi atan chuan ‘sovereign inernet’ neih tumin hma a la bawk.