Putin-a’n Russia-in North Korea pui dawn ti

North Korean leader Kim Jong Un chuan Russia a tlawh mekah Vladimir Putin nen ralthuam chungchangah inbiakna neiin an sawi dun zui.
Vostocheny space centre-a inbiakna an neih hnuah Putin chuan military cooperaton an sawi dun thu leh Russia chuan Pyongyang in satellite a neih theih nan a pui ang tiin a sawi.
US chuan Moscow chuan Ukraine indona a kalpui mekah North Korea hnen atangin ralthuam lei a tum tiin a sawi thung a.
Hei bakah hian US chuan Moscow in Pyongyang satellite programme a puihna a nei a nih chuan UN Security Council resolutions bawhchhiatna a ni dawn tiin a sawi bawk.
North Korea leh Russia te hi UN in a hrek mek ve ve niin Khawthlang ram te nena ram pahnih tena inlaichinna dawrawm tak an neih ve ve laiin inhmuhna an nei a ni.
Putin chuan Kim-an North Korea tlawh tura a sawmna a pawmzui bawk a. Khawvel ram hruaitu tlemte chauhin North Korea hi an la tlawh a ni.
Russia pan nan hian Kim chuan ni hnih zet Rel hmangin hun a hmang a. Soviet Union hun lai atang tawha North Korea nena inthiantha tawh an nih thu sawiin Putin chuan Kim a lawmna lamah ‘thian hlui te chu thian thar pahnih aiin an hlu zawk’ tih Russian thufing chu a sawi chhuak nghe nghe a ni.
Russia-in North Korea in satellite a neih theih nan a pui dawn em tia zawhna chu Putin chuan, “Chuvang a lawm Vostochny Cosmodrome-ah kan inhmuhna chhan ni,” tiin a chhang a ni.
Putin chuan topic hrang hrang an sawi dun tur thu sawiin ‘ralthuam chungchangah’ pawh Kim nen engkim an sawi dun tur thu a sawi bawk a.
Hetih lai hian Kim pawhi Ukraine indonaah Putin chu an thlawp tlat thu sawiin, “Russia chuan hegemonic forces te lakah a ram leh himna vawnhim tumin indona a kalpui a ni,” tiin Kim chuan Putin hnenah a sawi a.
“President Putin leh Russian leadership te thutlukna kan thlawp tlat reng dawn a. Imperialism tangrualin kan do zel ang,” tiin a sawi bawk.
North Korean leader chuan Russian warship te bakah factory hrang hrangte a tlawh dawn bawk a, engtia rei nge Russia-ah a cham dawn erawh hriat a ni lo.
Kumin chhungin North Korea chuan tum hnih lai spy satellite kahchhuahna nei tawhin a hlawhchham ve ve a, Pyongyang chuan military surveillance satellite neih a duh ngawih ngawih a ni.
US State Department thupuangtu Matthew Miller chuan Russia-in a pui a nih chuan North Korean missile programme tihchak zel nan Satellite technology a nei thei tiin a sawi a.
“Russia hian North Korea a pui a nih chuan UN Security Council Resolution tam tak a bawhchhe dawn a” chungah te chuan Russia ngei pawhin vote a thlakna vek a ni, tiin Mathew Miller chuan a sawi.
US pawhin a tul a nih chuan hmalakna a nei zui mai dawn tiin a sawi a, hei hi chhang letin Kremlin thung chuan Russia leh North Korea duh dan chu a pawimawh ber a, Washington duh danin pawimawhna a nei lo an ti hmiah zui bawk.
Tun hi kum 2019 hnua Kim-a’n ram pawn a zin tum khatna a ni a. North Korea a chhuahsan hnuhnung berah pawh khatih laia US president Donald Trump nena an inbiakna tlawh hnua Putin hmu tura a kal tho kha a ni.
Kim hian economic forum neihna leh Putin pawh a telna Vladivostok a pan tura an ngaih laiin mahse a Rel chuan Vostochny a pan zawk tlat a. Nilaini khan Kim-a’n a tum ram a thlen dawn tepah North Korea chuan short-range missile pahnih a kapchhuak zui a ni.
Kim leh Putin inhmuh hma hian Russian palaite chuan July thla khan North Korea an lo tlawh tawh a. Khatah khan Kim hian Pyongyang missile te bakah Hwasong intercontinental ballistic missile te pawh Russian palai defence minister Sergei Shoigu pawh telna chu a fanpui a ni.
Moscow hian North Korean ralthuamte a ngaihvenna chhan hi Russian weapons system nena inzul vek a nih avangin a hman mai theih vang tiin sawi a ni bawk a. A bik takin artillery shell te chu a inang tia sawi a ni.
Moscow chuan artillery shell te ang bakah silaimu te leh ‘missile hlui tawh lam’ te pawh Russia hnenah hian a pe thei tiin Kim Dong-yup, University of North Korean Studies professor chuan a sawi a.
Asian Institute for Policy Studies a researcher Yang Uk pawhin Pyongyang chuan short-range ballistic misisle te bakah ‘super-large’ rocket KN-25 te pawh Moscow hnenah a pe thei a ti bawk.
Russia hian a mamawh a phuhru zo rih si lo va, chung karah chuan a khaihlak tur ven nan North Korea ralthuam hi a mamawh tia sawi a ni bawk. Kim chuan Russia atangin food aid a beisei tia sawi niin hei bakah hian advanced submarine leh ballistic technology te a beisei dawn tia sawi a ni bawk.