Rahman-a lak luhnaah India aiawhin LS speaker tel dawn

Rahman-a lak luhnaah India aiawhin LS speaker tel dawn
Lok Sabha Speaker Om Birla chu Dhaka-a Bangladesh sorkar thar, Tarique Rahman-a kaihhruai lak luhnaah India aiawhin a tel dawn tih external affairs ministry-in a puang.
Bangladesh hian sorkar lak luh inkhawmah hian Prime Minister Narendra Modi Modi-a tel turin an sawm a, a aiawhin Birla hi a kal dawn a ni.
External affairs ministry-in thu an chhuahah chuan Birla hi ‘India leh Bangladesh mipuite inthian thatna thuk tak avangin’ a tel dawn tih a ni a. Ministry hian India chuan mipui rorelna a ngaihlu em em tih a tar lang bawk.
Ministry thuchhuah chuan Bangladesh-a Rahman-a kaihhruai mipui sorkar a ding leh tur chu lawmawm a ti hle tih tar langin, ‘a hmathlur leh lawmpuina a dawte chuan mipuite rilru a hneh a ni’ tih a sawi.
Bangladesh Nationalist Party (BNP) chief, prime minister hlui, Khaleda Zia-i fapa, Rahman-a hian an ram rorelna ina bial 300 awmah chiang takin hnehna a chang a. Hnehna a chan hnua lawmpuitu zingah Modi-a pawh a langsar pawl a ni.
X-ah Modi-a chuan BNP-in hnehna an chang chu Bangladesh mipuiin Rahman-a kaihhruai an ringtawk tih lanna a nih thu a tar lang a. “India chuan Bangladesh-a mipui rorelna, a than zelna a duhsakin a thlawp tlat a ni,” a ti a. Ram pahnih inkara neuh neuh awm pawh a fel thuai a beisei tih a tar lang tel.
Prime minister hian Rahman-a hi phone-in a be zui bawk a. “Hnehna a chan avangin ka lawmpui a. Duhsakna ka hlan a, Bangladesh mamawh a tihsaknaah hlawhtlinna chang zel turin ka duh a ni,” tiin Modi-ah hian X-ah tho a tar lang.
BNP pawhin Modi-a thuchah hi an chhang let a, an lawm thu X-ah vek an hrilh let.
Kum tam tak ram danga tlanchhia, Rahman-a hi nikum kum tawp khan a nu hriselna hniam zel avangin Dhaka-ah a haw a, a nu hian December 30-ah a thihsan zui.
Ningania an inthlanah khan BNP hian sorkar siam nana bial 151 lak an mamawh la tlingin Rahman-a hi prime minister a ni dawn a. Election Commission chuan bial 297 an chuhah bial 209 an la a, Jamaat-e-Islami-in bial 68 an la ve bawk.
July, 2024-a prime minister hlui, Sheikh Hasina-i an paih thlak hnuah Bangladesh hi Chief Adviser Muhammad Yunus-a kaihhruai sorkar lailawkin an kaihruai a. Hetih chhung hian India nena an inkar chu thil hrang hrang avangin a chhe hle.
Bangladesh hian India-a awm mek, Hasina-i thawn haw turin an ngen a, Delhi-in a tihlawhtling lo va. Bangladesh-a sakhaw zuitu tlem zawkte nekchepna thleng nasa nia sawi avangin India a lawm lo hle bawk.
Bangladesh-a Member of Parliament atana thlan tharte hi Thawhlehni chawhmaah Chief Election Commissioner (CEC) AMM Nasir Uddin-a’n a la lut ang a. President Mohammed Shahabuddin-a’n BNP Chairman Rahman-a cabinet chu tlaiah a la lut ve thung ang.
Rahman-a hian Chief Adviser Yunus thlakin prime minister a ni dawn a. Lak luh a nih veleh parliamentary party leader tur an thlang zui dawn tih a sawi.
Prime Minister Modi-a bakah hian Yunus-a hian amah thlaktu tur lak luhna turah hian China, Pakistan, Turkey, UAE, Qatar, Malaysia leh Sri Lanka telin ram 12 hruaitu a sawm niin Prothom Alo chuan a tar lang.