Rajesh Pilot-a’n Aizawl Bomb tu a pa ni lo ti

Congress leader Sachin Pilot chuan BJP IT department head Amit Malviya-a’n a pa Rajesh Pilot chu March 1966-a air force pilot a nih laia Mizoram bomb tu a tih chu a dikloh thu sawiin khami kum October thlaah a pa chuan Air Force a zawm ve chauh thu a sawi.
Twitter ni thin tuna X ni ta a post a siamah Malviya chuan Rajesh Pilot leh Suresh Kalmadi te chu Aizawl bomb tu Indian Air Force thlawhna te khalhtu niin March 5, 1966 khan Aizawl an bomb tiin a sawi.
“A hnuah an pahnih hian MP ni ve ve in Congress ticket a tlingin sorkar-ah minister an ni ve ve bawk a. Indira Gandhi khan lawmman pe in politics ah hmun a pe a, an khua leh tui nihpui Northeast mi te bomb tu chu zahna a hlan a ni” tiin Malviya chuan Hindi a post a siamah a tarlang.
Hei hi chhang letin Rajesh Pilot chuan, “I sawi dik lo va, i ni (date) sawi a dik hek lo. Ka pa kha Indian Air Force pilot a ni ngei a, ka pa khan bomb pawh a thlak ngei a. Mahse, a bomb thlakna te chu kum 1971 Indo-Pak war laiin East Pakistan-ah zawk a thlak a, i sawi angin 5th march 1966 ah Mizoram a thlak lo. 29th October 1966 khan IAF ah a lut ve chauh” tiin a chhang let a. Sachin Pilot hian a pa Rajesh Pilot commissioned a nihna cenrtificate a thil tel zui a, chutah chuan Indian Air Force pilot turin October 29, 1966 khan a lut chauh a ni.
Congress te chuan karkalta khan Prime Minister Narendra Modi an PM Indira Gandhi in kum 1966 a Indian Air Force te Mizoram buainaah a hmang tia a sawi chu na taka chhang letin politics a hamthat nana dik lo taka remchanga hman tumah an puh a ni.