Rajya Sabha-ah BJP te member pung

Candidate sawm pahnih lai te chu Upper House of Parliament Rajya Sabha member atan chuhtu awm lova thlan tlin an ni a. Heng zinga pakua hi BJP member niin pahnih dangte chu National Democratic Alliance (NDA)-a an thawhpuite niin Congress atangin pakhat thlan tlinin a awm bawk.
Tihian BJP te chuan upper House of Parliament-ah member an neih tipungin an allies te nen an tam belh hle a. National Democratic Alliance tena member an neihbelh chuan bill pass a tiawlsam dawn a ni.
Chuhtu awm lova thlan tlin zingah Union Minister Ravneet Singh Bittu, Rajasthan atang te, Madhya Pradesh atangin george Kurien te an tel a. Congress leader Abhishek Manu Singhvi chu Telangana atangin chuhtu awm lova thlantlinin a awm bawk.
BJP candidate thlantlin dang te chu Mission Ranjan Dass leh Rameshwar Teli, Assam, Manan Kumar Mishra, Bihar, Kiran Chaudhary, Haryana, Dhiryasheel Patil, Maharashtra, Mamata Mohanta, Odisha leh Rajeeb Bhattacharjee, Tripura te an ni.
NCP candidate Nitin Patil chu Maharashtra atanga thlantlin a ni a, Rashtriya Lok Morcha leader Upendra Kushwaha pawh Bihar atanga thlantlin niin NCP leh RLM te hi BJP allies te an ni.
NDA hian inthlanna neih hmain Rajya Sabha-ah MP 104 a nei a, tunah chuan 115 a nei tling ta a ni. Tihian Upper House of Parliament chuan member 237 a nei ta a, majority mark chu 119 a ni thung a, hmun ruak pariat la awmin Jammu and Kashmir atangin pali ruak a tel bawk.
NDA tena Rajya Sabha a member an neihpun avang hian BJP tena key legislation Waqf (Amendment) Bill te ang chuan Upper House of Parliament awlsam takin a paltlang mai rin a ni a. He bill hi Joint Parliamentary Committee enfiahna hnuaia awm mek a la ni thung.
Tihian Centre a NDA sorkar kaohruaitu BJP te hian Upper House ah member 96 nei mekin Congress te chuan 27 an nei mek thung a. Rajya Sabha seat sawm chu member te Lok Sabha a thlantlin an nih avanga ruak a ni.