Raltlante tan ngensak

Siaha mi tualthihnaa inhnamhnawiha puhte chu Arakan mi an nih avangin Burma atanga raltlan dangte chungah tuan lo turin Mizo Zirlai Pawl leh Network for Unity Association (Mizoram) chuan an ngensak.
NUA (Mizoram) thuchhuak chuan, tualthattute an dem a, lusun chhungte an tawrhpui tih a sawi a. Tualthattute chu Arakan state atang rawn kal Arakan mi, Lawngtlai refugee camp-a awm ni lo, January 20-a an bike (125 KENBO) chhia refugee camp-ah a part a awm avanga lei tuma lo lut an ni tih a sawi.
Myanmar raltlante theihtawpa tanpui a, chhawmdawltu zirlai pawl bakah NGO -YMA, YLA, MTP, ZoRO, MHIP adt. Mizoram mipui chungah lawmthu an sawi a, heng misualte pawikhawihna avang hian tlanchhiat leh chuan na tur nei tawh lo refugee-te tan thil duhawm lo zawk a thlen loh nan Mizoram mipui hriatthiamna an ngen tih a sawi a ni.
MZP Gen. Hqrs. pawhin thuchhuah siamin, Zawasa tualthihna chu pawi a tiin, a kalsan a chhungte a tawrhpui takzet tih a sawi a. Pawikhawihtute chu na taka an chunga hremna lekkawh turin thuneitute a ngen tih a sawi.
He pawikhawihnaa inhnamhnawihte hi Rakhine (Arakan) mi, Zohnahthlak raltlante nen inzawmna neilo nia hriat an nih avang leh Lawngtlai refugee camp-a awm pawh ni lo an nih avangin, an taksa himna zawnga Mizoram a lo tlan, mipui nunau pawi sawilote hmer tel lo turin Mizoram mipui a ngen tih a sawi a ni.