Ram, hnam leh sakhua tana la chet zel ka inhuam a ni – K Vanlalvena

Mizoram, Mizo hnam leh kan sakhua vawnhimna atana a lo chet tawhna chu chhunzawm zel a inhuam avangin Mizoram mipuiin Lok Sabha MP atan thlang turin a ngen tih K Vanlalvena chuan a sawi.
Lok Sabha inthlanpui neih tura MNF official candidate K Vanlalvena chuan Pathian leh an party hotute zarah kum thum leh a chanve chuang hret Rajya Sabha MP a ni ve tawh a. Term kal mek hi 2026 July-a tawp tawh tur a nih avang leh, a term tawp hnuah chuan thlak turin ruling party-in an party mi an duhsak zawng an theh chhuak ngei dawn tih hriatsa a nih avangin, Mizoram, Mizo hnam leh kan sakhua vawnhimna’n Parliament chhung leh pawna auchhuak zel tura hun tam zawk a neih theih nan Lok Sabha MP atana candidate nihna pawh pawm a ni tih a sawi.
“Tun tum Lok Sabha MP thlan turah hian Pathian leh mipui zarah hnehna ka chang a nih chuan kan ram, kan hnam leh kan sakhua a him theih nan Parliament House chhung leh pawnah a tul apiang ti turin ka inhuam a. Sum leh pai emaw chhung leh khat emaw chhuan tur engmah ka nei lo. Zoram mipuiin kan ram tana kan thil tih tlawm te te min hriatsaka min khawngaihna dawn beiseiin, Pathian kutah ka innghat a ni,” a ti.
Hmun hrang hranga cheng Zofate insuihkhawmna tura thil pawimawh hmasa, inunauna tha nei thei turin, a tul ang zela Zofa hnam hrang hrangte kuahkhawm tur leh, kan ram rawng hi nasa zawka a bawl chhunzawm theih nan mipui khawngaihna ngenin, amah vote turin a sawm tih K Vanlalvena hian a sawi.