Ram pathum tlawh turin
Modi-a a zin chhuak
Prime Minister Narendra Modi chu ram pathum tlawh turin Pathianni khan a zin chhuak a, Cyprus a tlawh hmasa ber ang.
Modi-a hi Canada-a G7 Summit-ah tel zuiin Croatia a tlawh leh dawn a. tun hi Operation Sindoor hnua ram pawna a zin chhuah hmasak ber a ni.
Thawhtanni hian G7 Summit-ah a tel dawn a, Cyprus a tlawh hi kum 20 chuang hnua Indian prime minister-in a tlawh lehna hmasa ber a ni a, Croatia a tlawh tur pawh hi Indian prime minister zinga tlawh hmasa ber a ni bawk ang.
Ministry of External Affairs (MEA) chuan Inrinni khan Pathianni leh Thawhtannia Cyprus a tlawh turah President Nikos Christodoulides-a nen Nicosia-ah an inkawm dawn tih a sawi a. Limassol-ah sumdawng hruaitute a kawm bawk ang.
Modi-a’n Cyprus a tlawh tur hi nakum kumve atanga EU Council president nihna a chelh tan dawn lai mek a ni a. An thenawm, Turkey-in ramri kâna firfiaka chetna chungchanga Pakistan a tan mek lai a ni bawk.
Cyprus a tlawh hnuah Thawhtanni leh Thawhlehniah Canada-a Kananaskis-ah G7 Summit-ah a tel dawn a, June 18-ah a haw lamah Croatia a tlawh bawk dawn a ni.
G7 Summit-a a tel tur hi a zawna a vawi ruk telna tur a ni dawn a. June 6 khan Canadian Prime Minister Mark Carney nen phone-a inbiain tel turin a sawm.
Carney-a nen hian an inkawm dawn bawk a. US President Donald Trump-a nen pawh February-a an inhmuh hnua a vawi khat nan hmaichhanah an inhmu leh dawn a ni.
G7 Summit-ah hian khawvel ram lian pasarih hruaitute nen khawvel puma harsatna awm mek te, indona kal mek leh thil dang dang an sawiho dawn a ni.
Ram pathum tlawh turin Modi-a a zin chhuak
Get real time updates directly on you device, subscribe now.