Ram pumah Job Fair hmang Aizawlah Law minister hoin

Assam Rifles buatsaihin Aizawlah Rozgar Mela/ Job Fair buatsaih a ni a, Union Minister of Law and Justice Arjun Ram Meghwal chuan telpuiin sawrkar laipui Ministry of Communication hnuai Department of Post-a branch post master leh assistant branch post master hna hmu thar mi 18 hnenah appointment letter a hlan.
Union Law minister chuan Prime minister duh dan angin hnalak reng reng langtlang, dik leh awlsam thei ang bera kalpui a ni tih a sawi a. Hna hmu thar appointment letter hlan takte leh an chhungte a lawmpui tih a sawi. Merit atanga teha tithaten dik taka hna an hmuh theih nana hma lak chu sawrkarin a ngaipawimawh, tiin, training tha tak neia hna thawk turin a chah a ni.
Ram chhunga Post Office-ten hma a sawn zel thu leh tihchangtlun mek zel a nih thu pawh Arjun Ram Meghwal hian a sawi a. India Post Payments Bank (IPPB) anga Post Office an thawh tawh avangin hna pangngai bakah banking thlengin an khawih a, hei vang hian hna hmu tharte tan training tha tak buatsaih turin Post Office hotute a chah.
Rozgar Mela hi sawrkar laipuiin hna neilote tana hna siamsakna kawnga hmalakna niin, hna zawngtu leh ruaituten awlsam zawka hma an lak ho theihnana ruahman a ni. Hemi kaltlang hian hna hmu tharte hnenah appointment letter sem chhuah thin a ni bawk.
Thawhtanni khan India ram state hrang hranga hmun 47 ah Rozgar Mela hi huaihawt a ni a; hemi kaltlang hian sawrkar laipui, state leh UT hnuaia department hrang hranga hna hmu thar mi nuai khat chuang hnenah appointment letter pek a ni.
Prime minister Narendra Modi chuan ram pum huap hun hman hi inbiak hmuh theihna kaltlangin a telpui a, thalai hna hmu tharte hnena thuchah sawiin appointment letter a sem chhuak a ni.