Ram sum dinhmun siamtha turin CM atan Lalsawta kan mamawh – Dr Lalmalsawma Nghaka

Ram sum dinhmun siamtha a, harsatna atanga mipui khaichhuak turin Mizoramin chief minister atan Pu Lalsawta a mamawh tih Congress treasurer Dr Lalmalsawma Nghaka chuan a sawi.
MPCC Aizawl South II Block Mahila-in Thawhlehnia political training an neih a hmanpuinaah Dr Lalmalsawma chuan Zoram mipui khaichhuak leh turin financial management tha a pawimawh a. Sum dinhmun a that miau loh chuan mipui khaichhuah kawngah harsatna tam tak kan tawk tih sawiin, “Chumi siamtha tur chuan midik, mi rinawm, leh sum enkawl thiam leh political will nghet tak nei Pu Lalsawta hi kan ram hian chief minister atan a mamawh hle a ni,” a ti.
Tang puihna policy chu rinawm leh nasa taka hna thawk mekte chawikan tumna policy, tumruh taka hna thawk mite dinchanna rama siam tumna policy a nih bakah mipui thawkho thiam tura inzirtir tumna a ni, tiin, “Society leh self help group leh PACS (Primary Agricultural Credit Societies) kaltlanga awmze nei zawka kan thawhrim rah kan seng theihna’na duan a ni tel bawk,” a ti. PACS kaltlanga mipuiin mahni inrintawkna nen an mamawh huna loan an inpek tawn theihna tur thlenga ruahhman a nih thu leh, ram mipui tana eizawnna ngelnghet kan neih tlan theihna policy a nih thu te a sawi bawk.
Thalaite tan eizawnna tam tak siam chu ramin a mamawh hle tih MPCC treasurer hian a sawi a. Thalaiten anmahni thiamthil, an tuina lama eizawnna siamsak theihna kawng sialna’n ‘tang puihna policy’ chu duan a ni tih a sawi.