Ram tan thih ka hlau lo – K Vanlalvena

Rajya Sabha MP a nih anga Mizoram tan leh Zohnahthlak tana a beihnaah a nunna atana hlauhawm khawpin beih a tawk a, ram tan erawh thih a hlau lo tih MP candidate K Vanlalvena chuan a sawi.
MP inthlan atana Tlabung leh Chawngte lama a campaign-naah K Vanlalvena chuan, English leh Hindi thiam nal tak MP kan neih tawhten a ram vei chanve pawhin an vei a ring lo tih a sawi.
Manipur Meiteite, Assam sawrkar leh Myanmar sipaite huat hlawh khawpin Zohnahthlakte thlavang a hauh a. Delhi thlengin Assam Police-in an umzui tih sawiin, “Ka nunna atana hlauhawm khawpin beih ka tawk a, kan ram tan chuan thih ka hlau lo. Meitei leh Myanmar sipaite nasa taka huat ka hlawh a. Ka thlavang hauhsakte hian min hnawl leh si chuan ka MP lehzelna turah ram tan auchhuah pawh zahthlak ka ti tawh khawpin ka ring,” a ti. Vote hmanga duhsakna lantir turin mipui a ngen tih a sawi
Covid len vanglaiin a MP tan a. An zin ve pawhin a haw velah kar khat chuang quarantine a ni thin a, kum 3 leh thla 8 MP a nih chhungin Mizoram tan thil tha tih duhin development work pawh hai chhuah duh mah se, MP a nih chhung khan ram tan a duh angin thil tha a ti hman loa, hreawm pawh a ti hle tih Rajya Sabha MP hian a sawi.
MP nilai hian a hmalaknaa sawrkar laipuiin Kawrpuichhuah border trade, Khawtlangtuipui chunga lirthei kalna tur lei, cheng vaibelchhe 54 senna tur a sanction tawh chu Commerce & Industry minister hlui Dr R Lalthangliana nen a hmunah an enfiah nghal a, hna chak taka a kal theih nan bawhzui thuai thuai a tum thu a sawi a ni.