Ram tana inkhelh bansan Neuer
Kum 2014 World Cup-a a ram champion-puitu Germany goalkeeper Manuel Neuer chuan international football a chawlhsan thu a puang.
Thla hmasa mai Euro 2024 quarter-final match pakhata Spain an hnehlohna inkhel kha ram tana Neuer-a match hnuhnungber niin, Germany tan match 124 a khel tling.
Kum 38 mi Bayern Munich goalkeeper hian kum 2009 khan a international debut a nghakchhuak a, ram tan major tournament pariat a khel tling.
Neuer hian Brazil ram World Cup final-a Argentina an hneh tum khan a tir atangin a khel a, a ram a champion-pui a; 2018 World Cup hma khan Germany captain atan ruat niin, kumin kumtir lam khan Ilkay Gundogan chuan a thlak ve chauh a ni.
Gundogan pawh hian tunkar tir lam khan international football a chawlhsan a; Germany home Euro lai khan an tlak rualin midfielder Toni Kroos pawhin a football career a lo zialfel ve tawh bawk.
Neuer hi chuan a club career a la chhunzawm rih dawn a, nikum khan kum 2025 thleng Bundesliga giants-a cham zui turin contract thar a ziak.