Ram tana thi police-te hriatrenga Ni hmang

Ram tana thi police-te
hriatrenga Ni hmang
Ram tana an duty laia hmelma kuta nunna chan police-te hriatrenga Ni – Police Commemoration Day chu kumtin October 21-a hman thin a nih angin kuminah pawh India ram pumah hman a ni.
Mizoram-ah pawh Thawhlehni zing dar 7 khan Police hmunpui hrang hrang, district headquarters leh battalion headquarters-ah Commemoration Parade neih a ni a. Mizoram Police hnuaia Commemoration Parade hmanna pui ber hi 1st Bn. MAP Hqrs Armed Veng Aizawl-a Martar Thlan-ah neiin, Mizoram Police senior officers bakah CRPF, SIB leh Assam Rifles atanga officer kalte nen martar-te sunna hun hman a ni a, martar thlanah zahna pangpar dah a ni.
1959 October 21 khan DCIO Karam Singh hona hnuaia 3rd Battalion CRPF police party tlemte chuan Ladakh hmuna Hot Springs area, tuipui atanga feet 15000 – 16000 a sangah ramri venga an patrol chu Chinese sipai, ralthuam famkim leh hmanraw tha tak taka thuamte chuan lo lambunin police 10-in nunna an chan a, police 7 chu hliam tuar chunga man an ni.
He thil thlen hnu, kum 1960-a ‘Annual Conference of IGP of States and UT’ neih chuan October 21 chu ‘Police Commemoration Day’ atana pawm turin resolution an pass a. Chutiang chuan kum 1960 atang khan October 21 hi kumtin Police Commemoration Day atan hman thin niin, state khawpui leh district headquarters tinah India ram humhalhna kawnga inpekna sang ber, mahni nunna hlantu police martar-te chawimawina atan hman thin a ni.
2024 September 1 leh 2025 August 31 inkar khan India ram pumah police mi 191-in ram leh hnam tan nunna an hlan a. 1947 August 15 atanga kumin August 31 thleng hian police mi leh sa 36637 ram leh hnam tana nunna hlan an awm tawh a ni.
Kumin chhung hian vanneihthlak takin Mizoram Police zingah duty laia hmelma kuta thi an awm loa, kum 1966 atanga vawiin thlengin Mizoram Police zingah ram leh hnam tana nunna hlan mi 54 an awm tawh.