RAMHLUI ZIA PAIH A HUN
By H Lalchhuanliana
Ramhlui zia han tih hian Politiciante politics khelh dan tha lo leh hnawl hun tawh, an la paih theih si loh hi kan tinzawn dawn a ni. Chutiang thil tam tak zinga langsar zual leh tunlai huna chhunzawm zel tawh loh tura tha thenkhat chauh lo tar lang ila.
POLITICS TUI NU
Kan rama Politics tobul fuh tawk lo avanga ruling party mite chauh inhaivurna leh induhsakna vawiin thlenga an la kalpui ngar ngar hi ‘Politics tui nu’ chu a ni ber awm e. Politics awmze dik tak chu mithiamten an sawi fo tawh a, August ’23 Didakhe chhuakah pawh khan Pathian thu thiam zing ami Rev Dr FH Liansangzuala ATC ami khan party politics chung changte a ziak a, a tha hle mai( lo chhiar theuh teh u!). Pol.party ruihchilh a that lohnate leh Politics hi Kohhran mite chuan Pathian rawngbawlna ang thova Pathian rawngbawlna huang, Pathian thu leh Pathian duh dan kan nun chhuahpuina hmun pawimawh tak a nih thute kha a tha hle mai . Kohhrana rawngbawltu pawimawh tak tak, kan Politician ni bawk te thlengin khi khi an hre lo ni lovin, inthlana an tlin lehna tur ngaihtuah ran chungin ‘Tui nu’ ah an la inchiah lui ngar ngar a ni ber a, hei hi tihbo ngai chu a ni e. Kohhrana rawngbawlna leh ram rawngbawl hna kha an dah hran vang pawh a ni mai thei bawk. Politics dik chu a tui a nu tur a ni lova, kan ramah hian a pian a fuh tawk loh vang nge a fim lo rei ta hle mai a, engtikah tak fim ang maw. Mipuite pawh hian Politics hi Kohhrana rawngbawltu pawimawh tak takte telna tlak a nih zia leh mi tha leh rintlakte telna tur a nih thute hi inzirtir a tul hlein a lang.Kohrana rawngbawltu, ram rorelna hi Kohhran huang chhunga rawngbawlna tho tih hre lo hnen atang chuan ram rorelna tha a beiseiawm loh ang.
PAWISA LEH CONTRACT-A THLEMNA Political party-te chuan election-a an chak theihnan candidate tur atan mi hming tha an zawng a, Kohhran upate phei chu ruih theih leh mipat hmeichhiatna laka fihlim tura ngaih an niin sawm pawh an hlawh hle a ni . Chutiang bawkin mi hmingtha, mipui hriat hlawh leh vote hmu thei awm deuh tur an rim kual leh a, a la awm tho zel a ni. Party dang a mi tha leh tlinpui theih tura an beiseite thlengin an rim kual leh a, mahni partya lungawi lote phei chuan rim an hlawh rang hle thin an ti. Tun hnaia thil duhawm lo leh bawlhhlawh tak sawi thawm awm chu – Pawisa leh Contract hna pek tawktarha beram inruksak tumna leh mahni partya lungawi lote Contract hna peka thlemna thawm hi a ni. Hei hi thudik a nih ngat chuan MPF te hi inrawlh hial se a tha hle ang. Sum leh pai leh therhlo hmanga vote zawn thawm hi a ninawm ta e. Sum tawktarha vote zawng lo tur leh dik lo taka inthlan hmachhawn lo turin MPF leh pol.party zawng zawngten thuthlung an siam a nih kha. Kohhran hruaitute ngenna pawisa duh lo an awm anih chuan Kohhran mite leh thangtharte hian an ngaidam reng lo vang tih hriat a tha a, ramhlui zia a ni e.
DAWT SAWI LEH MIMAL INSAWICHHIAT
Politics dikah chuan dawt sawi leh mimal insawichhiatna a leng tur a ni lo ang. Famkim lo mihring kan ni vek a, mahse dawt leh phuahchawp sawi mai mai hi kan politician-te hian ching lo se, mimal insawichhiat thleng hian a kristian zia lo a ni. Mahni policy leh manifestote zuar mai se, chu pawh chu insawi chhiat leh insawihnawm sak lo sela, mipuiin ngun taka rilru leh ngaihtuahna sengin duh kan thlang mai dawn a ni. Ramhlui zia politics, mahni chhungkua first, party mite second, mipui third tih hi kan kalpui rei ta ngat ngat hle mai, mipui first tih hi ni tawh teh se. Ram roreltuten dawta mipui an la bum fo chuan thangthar rilru thianghlim tak takte hian inthlan hunah vote hmangin an la chhang let em em ang, fimkhur hle teh se.
CHIEF MINISTER DIK
Politics tui nu tifim tura pawimawh ber chu- Chief Minister dik leh rinawm, dan rorelna ngai pawimawha huaisen taka dan lek kawh ngam CM a ni. Mi thenkhatin kan phu tawk ram roreltu kan nei zel an ti a, thenkhatin tun aia tha zawk ram roreltu neih hi kan phu ve tawh a ni an ti thung a, inhnial theih tak a ni awm e. CM chu ram hmangaih tak taktu, hausak tum lo mai ni lo, retheih zawk pawh huama mahni inphata mipui tana inpe tak tak a nih a ngai. Corruptiona fihlim, a hnuaia mite entawn tlak, hrem ngaite hrem ngam hruaitu lu ber an pawimawh reng a ni. Hausate hausak belh zelna lam aia thawk rim leh mi rethei zawkte lam hawi Project siam thiam leh tih takzeta hma latu hi kan mamawh ber a la niin a lang. Mizote hi thuawih thei tak leh sawrkar tanpui a tul huna inhawng tak hnam kan ni a, hruaitu tha leh rintlak chu kan zui dual mai ang. Eng party pawhin rorelna lo chang se, CM apiangte chu ram nu leh pa ber an nih angin mipui huapzo CM ni ngei teh se. Mirethei tanpui kawngah pawh mipui pawisa (MIP, NLUP, SEDP etc) hi ruling party member zawnnan hmang lovin, a mamawh apiangte hnen thleng pha tura hma la ngam hruaitu kan mamawh a ni. Lui pawh a hnar a fim chuan a mawng lam a fim mai thin tih hi entirna tha leh dik a la ni reng e. Kan phu tawk ram hruaitu kan nei thin i ti nge tun aia tha zawk hi kan phu ve tawh tih chu kum tawp inthlana i vote khan a hril dawn. Ramhlui zia bansanin bung (chapter) thar kai turin hma i la theuh ang u.