Ramri-ah thenawm state nen lungrual tlanna zawn pawimawh: HM

Home Minister K. Sapdanga, Mizoram State Boundary Committee Chairman ni bawk chuan, ramri him tak, mipuite thlamuang taka an khawsak theihna tur nawr chhuah chu an thupui ber a nih thu sawiin, “|henawm state-te nen kan lungrual tlanna tur kan zawn a pawimawh a ni,” a ti.He thu hi nimina Directorate of Forensic Science Laboratory Conference hall-a Mizoram State Boundary Committee thutkhawm vawi 6-na neihah home minister hian a sawi a; sawrkar hmasa hmalaknate chu zahawm a tih thu sawiin an ngai pawimawh hle tih a sawi bawk.
Meeting-ah hian H. Lalengmawia, Commissioner & Secretary, Home Department, Boundary Committee Member Secretary ni bawk chuan report a pe a. Boundary Committee meeting hian sawrkar hmasa hun tawp lama Mizoram sawrkar leh Assam sawrkar indawrna kal tluang lai, Mizoram inthlanpui neih dawn vanga chawlh lailawk chu tharthawh tura hmalak tha a ti a, hun remchang hmasa berah thutkhawm leh nise an ti a ni.
Meeting-ah hian EF&CC Minister, Boundary Committee Vice-Chairman ni bawk Lalthansanga, Chief Secretary Dr Renu Sharma, DGP Anil Shukla bakah Boundary Committee Member zingah MNF, ZPM, MPCC, AAP, BJP, MZP, MSU, CYMA, MUP, MKHC, JAC on ILRFD aiawhte an tel a, ramri chungchanga mithiam sawm bikte leh Home Department official pawimawhte an tel bawk.
Boundary Committe thutkhawm hmasa ber hi July ni 30, 2021 khan neih a ni a, thutkhawm vawi 2-na hi September ni 7, 2021 khan neih niin a vawi 3-na chu November ni 17, 2021 khan neih a ni a, a vawi 4-na September ni 9, 2022 ah neih niin, a vawi 5-na hi January ni 20, 2023 khan neih a ni. Tun tum hi Mizoram sawrkar thar a pian hnua thutkhawm vawi 1-na a ni.