Ran chaw siamah tanlak a ngai

Animal Feed Plant, Ramrikawn, Aizawl hi Mizorama sawrkar enkawl ranchaw siamna hmunpui ber a ni a. Tunah hian khawl pahnih awmin ni tin ran chaw ton 10 vel a siam chhuak a, chu chu khawlin ni khata ran chaw a siam chhuah theih zat hmun sawma thena hmun khat vel chauh a ni.
Engatinge a va her chhuak tlem ve? tih zawhna a awm nghal a, a chhanna chu demand a tlem vang a ni. Engatinge demand a tlem? tih zawhna a awm leh nghal a, a chhan chu, ranvulhtute hian dawrah a bâ-in an la thei a, Feed Plant atang erawh chuan a bâ-in a pek ve theih loh a, ranvulhtuten a bâa lei theihna lam an pan ta mai thin a, Feed Plant hian demand a hmu tlem ta a ni. Thudawnna pakhatin a sawi dan chuan, dawr pakhatah ringawt pawh ranchaw lak batna hi cheng nuai 200 te a tling thei a ni.
AH&Vety dept enkawl Feed Plant hi revolving fund nuai 30 hmanga bultan niin, chu ringawt chu a ring char char a, tlem tlemin a lo pung ve hret hret a, kum 20 vel chhungin cheng vbch 1.4 hu a tling ve thei hram a ni.
Hetih lai hian, kan state-in ranchaw a siamchhuahnaa a chawhpawlh pui ber Vaimim, state pawn atanga chawkluh a ngai tlat mai hi a veiawm hle a. Ranchaw siamna chawhpawlhah hian Vaimim hi 50-60% vel hman a ni a. Vaimim mamawh zat 90% vel hi state pawn atanga lei a ni a, state chhungah chuan 10% vel lei tur a awm ve thin a; lei tur a awm miah loh changte pawh a la awm ve lehzel thin bawk.
Vaimim hi kan ram leilungah a tha duh a, ranchaw siamna khawl chawm zo khawp kan la thar chhuak lo tlat mai hi mutmawh hnarmawha neih a hun tawh. Vaimim lei nana state pawna heti zat sum a luang chhuak reng mai hi a uiawm takzet a. Sawrkar thar hnuaia ‘hand holding policy’ hmanga hma lakna tur pawimawh tak niin a lang. Vaimim contract farming hi a kaihhnawih department horti, agri leh AH&Vety dept ten coordination tha tak nei chunga kalpui theih a ni a, hei hian eizawnna tam zawk a siam chhuak nghal ang a, sum leng vel pawh state chhungah vek a nih dawn avangin state economy chawikanna tha tak a tling theiin a rinawm a ni.