Rangkachak khura buainaah mi paruk thi

Rangkachak khura buainaah mi paruk thi
Bolivia-a rangkachak laih chhuahna hmuna buaina chhuakah thil tipuakin mi paruk an thi niin thuneituten an sawi.
Ningania thil thleng hi an khawpui, La Paz atanga hmarthlang lam km 150 vela hla, Yani mining camp-a thleng a ni.
“Mi paruk an thi a, chin hriat loh pawh an awm,” tiin thil lai chhuaktu pawl pakhat zawk, Hijos de Ingenio Mining Cooperative aiawh, Jhonny Silva chuan a sawi.
Lai chhuaktute hi khur pawh theihna chungchang avangin pawl dang, Senor de Mayo nen intibuaiin dynamite an chelek ta a. Puak hian in tam tak tichhiain Sorata khua chuan power an neih loh phah.
“Lehlam pawl hian dynamite hmangin khawl an tichhia a, diesel tank pawh an tichhia a ni,” tiin Silva chuan a sawi.
Bolivia-ah hian sorkar leh mi mal enkawl bakah a huhova tangruala thil lai chhuak an awm a. Mi tam tak chuan company lianten an chhawr dan chu a nghet lo va, an hlawh a hlem em em a, thil man sang zelah an hna chu a rintlak tawk lo niin an ngai.
A huhova chet chhuahna hi kum 1985 chho vela eibara an ram a harh thar lai leh khawvel puma thil laih chhuah man a hniam laia intan a ni a. Hetih lai hi sorkar hnuaia mining company Corporación Minera de Bolivia (COMIBOL) tihtawp lailawk a nih lai a ni bawk.
Hetih lai hian Bolivian miner tam takin hna an nei lo va, Bolivia hian khurte chu mi mal kutah dahin a laitute pawh anmahni remhriatnain an chet a ngai ta a. Thenkhat chuan rangva, silver, rangkachak leh zinc te chu mi mal sumdawngah an hralh thin.
Tunah chuan tangruala laitute hi thil laih chhuahnaah a chak ber ni tawhin COMIBOL leh mi mal aiin an tam tawh a. Company lian tak tak ai pawhin a laih chhuahna hmanrua leh laih chhuah pawh a tam zawk.
Rangkachak laihnaa a huhova inhlawmte hi 1,600 chuang an awm a, heng tangrual hrang hrangte inkarah hian buaina a chhuak ta fo va, a chang chuan COMIBOL leh venhim hna thawktute pawh an inrawlh ve thun bawk.
Kum 2012 pawh khan COMIBOL leh tangrualte hi intibuaiin kawng an dang a, dynamite-in La Paz pawh an bei.
Ningania dynamite hmanga inbeihna pawh hi pawl hnih intihbuaina niin kum tam tak atanga lo iner tawh an ni tih Silva chuan a sawi.