Ratan Tata hming chawiin Assam-a Electronic City ti dawn

Ratan Tata hming chawiin Assam-a Electronic City ti dawn
Assam Chief Minister Himanta Biswa Sarma chuan Guwahati-a Jagi road-a Electronic City din tur, India-a semiconductor plant hmasa ber dinna tur ni bawk chu industrialist leh philanthropist Ratan Tata hming chawitir a nih tur thu Thawhlehni khan a puang.
Cabinet thukhawmin October 9, 2024-a thi ta, Tata chawimawi nan khawpui din thar tur hi a hming sak turin a ti tih chief minister chuan a sawi.
Sarma-a chuan Tata-a’n Assam-a semiconductor plant din tura thutlukna a siam kha thil thlak danglamtu a nih thu a sawi bawk.
“Tata group leh boral ta, Ratan Rata thawhna zawng zawng thlir chungin state cabinet chuan semiconductor plant, electronic park, leh Electronic City din tur huam chin zawng zawng chu Ratan Tata Electronic City tih a ni ang. Ratan Tata khan he hmunah hian semiconductor plant din tur a nih thu puang lo sela chuan keini chuan a nachang kan hre dawn miah lo va, industrialist lian dangte pawhin Assam lam an lo hawi hek lo vang,” tiin Sarma chuan a sawi.
Electronic City hi India hmarchhaka a hmasa ber tur a ni a, semiconductor leh electronic bungraw changkang siam lam chu an bitum deuh bik dawn a ni.
Tata hi Assam nen inkungkaihna thuk tak nei sa an ni a, Tata Group hi tea industry-a investment ti hmasa pawl an ni a. Rs vaibelchhe 27,000 senna tur chip assembly plant dinna ruahmanna siamin Assam chu semiconductor hub-a chantir a tum a ni.
Kum 2022 khan Tata hi Assam chuan an state-in civil mi chawimawina a pek theih sang ber, Assam Baibhav a lo hlan tawh nghe nghe.
Heng bakah hian industrialist thi ta hian Assam-ah hian cancer enkawlna kawngah pawh tha a thawh nasa hle a. Assam-a cancer beihnaah sum leh tha tam tak a thawh a, a bikin rethei zawk, cancer inenkawlna man to tak nei zo lote puihna kawngah a inhmang nasa hle.