Ration card siamremin vbch.3 vel tal hum tum

Subsidy-a ration buhfai sem thinah Mizoram sawrkarin mipui hnen atanga a hmuh let tawh loh thla tina cheng vaibelchhe 13 chuang sen thin chu vaibelchhe 3 vel tala tlakhniam tir tumin, ration card siamrem lamah hma an la zel dawn tih Supply minister B Lalchhanzova chuan a sawi.
FCS&CA minister sawi danin, National Food Security Act (NFSA) hman hnu ah Mizorama ration card nei chhungkaw 286362 an awm a, a lu nung chuan mi 1167024 kan ni.
Heng ho hi card eng, pawl leh a var nei kan ni a. NFSA hian Mizoram mihring 706296 thun phalsak kan ni a; heng atang hian card vara awm thei tur mi 419934 kan ni.
Kumin January-ah ration buhfai leina sensoa sawrkar hman chu Rs 1,56,927,944 a ni a; heta subsidy-a senso chu Rs. 7,47,58,271 niin, transportation cost-ah cheng vaibelchhe 6 vel sen a ni. Heta sum hmuh let loh tura sen chu cheng vbch. 13.47 a ni.
Card eng hi chhungkua/ mimal khawsak dinhmun ngaihtuahawm, a thlawna buhfai dawn loh chuan ei tur nei lo mai tur, sum thawkchhuak tura theihna nei tam lo – rualbanlo emaw nitin inhlawh chawpa ei hmu ang chi neih tur a ni a. Card pawl chu card eng nei aia tlema ngaihtuah awm loh deuh, sawrkar puihna tel loa buhfai eikhawp nei zo lo, chhawmdawl mamawh leh vantlangin an puihbawm ngaite neih tur a ni tih sawi a ni.

Sawrkar hmalak tumna:

8 Ration card var nei mek zingah dinhmun harsa an la awm chuan, NFSA huanga sawn luh
8 NFSA card nei zingah NFSA-in a huam loh tur chhungkua an awm chuan, card var lama sawn chhoh
8 February thla hian DCSO hnena in report theih a ni
8 Card var nei hnena subsidy pek thin ennawn a, subsidy-a sum sen thla khata vbch.3 vel tala tih hniam