RBI officer-a inchhal Rs. mtd 70 phur ATM cash van rawktu pathum man

a ATM cash van rawka Rs. maktaduai 70 vel ruk kaihhnawihah an ralthuam nen mipa pathum man an ni.
Inrinni khan India chhim lama Bengaluru khawpuiah police-in he pawikhawihna hi hai chhuakin a hma ni thum liam taa Rs. maktaduai 57.6 bo an hmu chhuak bawk.
“Pawisa dang la hmuh kim lohte pawh hi hmuh turin kan chhui zui mek zel,” tiin Bengaluru Police Commissioner Seemant Kumar Singh-a chuan thuthar lakhawmtute hnenah a sawi.
Singh-a chuan mipa pathum rinhlelh an man thu a sawi a, “Mi dang pahnih thum vel kan la zawng zui mek bawk,” a ti.
An man zinga pakhat hi Gopal Prasad-a niin cash transport company CMS-a thawk a ni a. J Xavier-a pawh CMS-a thawk thin niin mi dang pakhat, Annappa Naik-a erawh police constable a ni thung.
Van an rawk hi chhun ên lai niin Lalbagh veng, Bengaluru-ah a ni.
An pathum hian Reserve Bank of India (RBI) officer angin an insawi a. Van hi lo tidingin lehkha pawimawh tak tak a lem an siam hmangin pawisa an phurhte chu an laksak a ni.
Lirtheia pawisa vawngtu leh vengtu pahnihte chu SUV-ah luhtirin an zinga pakhatin van chu a khalh zui ta niin police chuan an sawi.
Police chuan an lirthei an thlak a, an lirthei hman zui tak hi registration plate lem inbelh niin CCTV awm that lohna lam an panpui a, hetah hian pawisa an phurhte pawh an hlang kual ta niin an sawi.
Nilaini kal ta khan Karnataka bakah an thenawma Kerala, Tamil Nadu, Telangana, Andhra Pradesh leh Goa-ah police officer 200 rualin anmahni zawn hna hi an thawk tan a ni.
Detective-ten he thil thlengah hian CMS an inrawlh dan leh pawisa phurh kualah inkaihhruaina an zawm loh a awm em tih pawh an chhui tel tih Singh-a chuan a sawi.
“Pawisa phurtute hian kawng ngai an zawh thei lo va, an thlen hun tur pawh sawi lawk theih loh turin thlak reng tur an ni,” a ti.