Real chakpuitu Jude Bellingham

Pathianni zan khan football club inkhel ngaihven hlawh tak mai El-Clasico khelh a ni a. An mualah tum hnih ngawt an hnufual hnuin Real Madrid in an mikhual FC Barcelona an lehthal a, hun pek belha Jude Bellingham goal thun hmangin hnehna hlu tak an chang. An elpui lian ber Barcelona laka an chak vangin Real Madrid hian point 11 zetin hma an hruai fal tawh a, champion an hnaih deuh deuh zel.
Barcelona hian an len luhna mualah Santiago Bernabeu-ah bul an tan tha viau a, hma takah goal an thun. Inkhel tan atanga minutk rukna lekah defender Andreas Christensen chuan corner atanga ball kal chu hnaite atangin a tauh goal a, hmahruaina goal a thun. An hmelma lian ber Real lakah hma taka goal an thun vangin Barca hi Santiago Bernabeu-ah inrintawkna sang tak nen an inlan.
Hma takah goal chhuah mahse Real Madrid an buai lova, an phur sauh zawk emaw tih tur a ni. Na takin an khingpuite an nawr let nghal a, Vinicius Junior chuan goal a thun nghal teuh hle. An hun tha an hlah hnuin minute 16-naah captain Lucas Vazquez chuan tha zetin ball a khalh lut. Vazquez hi Pau Cubarsi chuan titluin penalty a chawi. He penalty hi Vinicius Junior chuan awlsam takin a pet goal a, minute 18-naah an si phurh a sut. Goal khat ve ve an thun hnuin inkhel a hmuhnawm zui viau a, chawlhlawk hmain goal thun belh thei an awm lo.
Chawlhlawk hnu lamah mikhual team FC Barcelona in goal an thun hmasa leh. Mawi taka Real Madrid tlarhnung an thiah hnuin Fermín López chuan minute 69-naah chiang zetin a pet goal a, hma an hruai nawn lehna goal a thun. Hnufual zawkah tang nawn leh mah se Real Madrid an buai mai lova, goal hmangin an mikhualte an chhanglet leh thuai. Vinícius Júnior cross tha zet mai chu tibuaitu nei lo Lucas Vazquez chuan near post-ah chiang zetin a pet goal a, minute 73-naah an si phurh a sut.
2-2 a nih hnuin Real Madrid an hlauhawm zui viau. Goal khat thun tawh Vinicius Junior chuan goal thun theihna hun tha tak a hlah a, Barca an him hram. Hun pangngaiah goal dang a luh belh theih loh hnu, hun pek belh minute 90+1-ah Real Madrid hian fuh zetin an mikhualte an nawr let thut a, Vazquez siamsak tha zet mai chu Jude Bellingham chuan hnaite atangin a pet goal a, hma an hruai letna goal a thun. Bellingham goal thun hi Barca in hun tawp thlengin an sut thei lova, Real Madrid chuan an hmelma lian ber Barcelona lakah hnehna pawimawh tak an chang ta a ni.
An hnuai chiaha awm Barcelona lakah an chak vangin Real Madrid hian khelh 32 atangin point 81 an hmu a, point 11 zetin hma an hruai fal tawh. Real Madrid hian khelh ruk chiah khelh hmabak an nei tawh a, La Liga-ah champion turin an dinhmun a tha tawh hle.