Real hnehtu Barcelona in champion an hnaih

Pathianni zan khan season kal meka a vawi li nan El Clasico khelh a ni a, inkhel hmuhnawm takah FC Barcelona in 4-3 in hnehna an chang. An elpui lian Real Madrid an hneh vangin Barca in champion an hnaih leh zual a, kar tawp lamah champion theihna hun tha an nei zui dawn.
La Liga champion lai Real Madrid hi season kal meka an ngam loh Barcelona hmachhawn turin Estadi Olímpic Lluís Companys-ah an leng lut. Mikhual an nihna hmunah bul an tan tha viau a, minute 14 chhung lekin goal hnih an thun hman. An elpui lian ber Barcelona lakah bul tan tha viau mah se ni dang ang thoin an tlo zo lova, tlawm zawkah an tang leh ta tho thung. Real Madrid tan hian Kylian Mbappe chuan hattrick hial siam bawk mah se an team tlawm tur erawh a chhanhim zo chuang lo.
Barcelona nen an inkar tizim a, champion beiseina sang zawk nei tura chak mamawh Real Madrid tan hian Kylian Mbappe chuan penalty a hlawhchhuak nghal thuai. Ama hlawhchhuah ngei penalty hi Mbappe hian harsatna tawk lovin a pet goal a, minute ngana lekah hmahruaina goal a thun. Hma takah goal an thun vangin Los Blancos an phur viau a, goal dang an thun belh leh thuai. An si phurh sut an tum luatah Catalan club lian an chesual a, an khingpuite nawr let an tuar lo. Goal hmahruai thuntu Mbappe chuan minute 14-naa inringtawk zetin a pet goal nawn leh a, hma an hruaina a tizau.
Real Madrid in hma taka goal hnih an thun hi inkhel tihmuhnawm zualtu a ni a, Barcelona in Real Madrid an ngam zia tifiah zualtu a ni tel bawk. Barca hian an si phurh sut ngei tumin tan an khawh a, inkhel a hmuhnawm zui hle. Inkhel hmuhnawm takah Barcelona tan Eric Garcia chuan minute 19-naah awlsam takin a tauh goal a, an si phurh a sut. Garcia goal thun hian Hansi Flick a team te a fuih phur thar hluai a, game a inthlak thleng zui ta hlawk bawk.
Phur tharna namen lo tak nena inlan Barcelona tan hian rawlthar hmuhnawm Lamine Yamal chuan minute 32-naah mawi zetin a pet goal a, an si phurh a sut zo. Goal hnih an chhuah zawn vangin Real Madrid an buai a, goal an chhuah zui leh thuai bawk. Yamal goal thun atanga minute hnih hnu lekah Barca in fuh zetin an mikhualte an nawr tlang zui leh nghal. Season kal meka chetha tluang tak Raphinha chuan lei hrulah fuh zetin a pet goal zui leh ta mai a, minute 34-naah hma an hruai letna goal a thun.
An elpui lian lakah hma hruai let a, an lehthal vangin Barca phurna a so sang bulh bulh hle. Hnual taka inlan Real Madrid an talbuai tak zet. Barcelona hmahruai letna goal thuntu Raphinha chuan Yamal siamsak atangin tauh luh theihna hun tha zet mai a nei a, a tauh san hret vangin a hun tha neih chu uiawm takin a hlah tlat thung. A hun tha neih hlah bawk mah se Real Madrid defender chetsual vangin Raphinha hian goal thun theihna hun tha a nei leh thuai tho thung. Chiang zeta an khingpui tlarhnung an thiah hnuin Raphinha chuan chiang zetin a pet goal a, minute 45-naah an goal lina a thun a, 4-2 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, goal thun belh tumin an innawr tawn nasa hle. Inkhel tihmuhnawm leh zual turin Real Madrd in goal an thun hmasa leh. Fuh taka an khingpui tlarhnung an thiah hnuin Vinicius Junior chuan Mbappe tan fing takin a siamsak a, Mbappe hian minute 70-naah an goal thumna thunin an si phurh a sut then a, Barcelona lakah a vawi khat nan hattrick a siam. Kylian Mbappé hian a club thar Real Madrid tan hattrick a siam vawi thumna a ni a. Real Madrid player zingah kum 30 zet hnuah Barcelona laka hattrick siam leh thei hmasa ber a ni. Kum 1995 khan La Liga-a Barcelona an hmachhawn tumin Iván Zamorano chuan hattrick a siam. Zamorano hnung zui thei an awm loh vang vang hnuin Mbappe a rawn lang ve leh ta nawlh a ni. Mbappe hian season kal mekah Real Madrid tan gaol 39 ngawt a thun tling tawh a, Real Madrid tan season khatnaa goal thun hnem ber niin Iván Zamorano record a khum ta bawk. Hei mai hi a la ni lo, Mbappe hian La Liga-a a season hmasa berah goal 27 a thun tling der tawh a, La Liga season khatnaa goal thun hnem ber Cristiano Ronaldo record khumin record thar a siam hial tawh bawk.
Mbappe-a’n hattrick a siam hnu hian Real Madrid in an si phurh an sut zo teuh hle a, vanneihthlak takin Barcelona an him hlauh. An inkar tizau leh zual turin Barca in goal thun belh tumin tan an khawh a, an hlauhawm thei hle. Hand-ball vangin penalty hlawhchhuak ngei turah inngai mah se mak tak maiin an hlawhtling lo va, mak tak bawkin Ferran Torres goal thun chu hand-ball vangin hnawl a ni teh tlat bawk. Goal hnih thun tawh Raphinha pawhin hattrick siam theihna hun tha zet mai a nei a, uiawm takin a hun tha neih a chhawr tangkai zo lova, El Clasico-a hattrick siam thei zingah a hming a la tel thei rih lo. Inkhel hmuhnawm tak hi 4-3 in a tawp a, Barcelona in hnehna hlu tak an chang.
An elpui lian ber Real Madrid lakah an chak vangin Barcelona hian khelh hmabak khelh thum chauh nei tawh chungin point 7 in hma an hruai fal a, champion an hnaih hle tawh. Barca hian ningani zanah Espanyol an hmachhawn dawn a, RCDE Stadium-ah an chak a nih chuan La Liga champion thar an ni ang. Nilai zan hian Real Madrid Santiago Bernabeu-ah Mallorca an mikhual dawn a, an mualah Real Madrid an tlawm a nih chuan Barcelona hi champion thar an ni thei nghal dawn bawk.
German manager Hansi Flick-a’n Barcelona a enkawl hnuin an elpui lian Real Madrid hi vawi li an hmachhawn tawh a, chak zawk an la ni vek. La Liga-ah vawi hnih an hneh tawh a, inkhel pawimawh dang; Spanish Super Cup final leh Copa del Rey final-ah te an chak zawk bawk a. An hmelma lian ber hnehin trophy pahnih an chawi tawh a, La Liga trophy an chawi zui leh ngei dawn niin a lang ta bawk. Barcelona hi kum 1982-83 hnu lamah a vawi khat nan El Clasico-ah vawi li an chak zawn. Real Madrid hian season kal meka Barcelona an hmachhawn vawi liah goal 16 ngawt an chhuah a, an elpui lian an ngam lo hle.
Barca hian Real Madrid lakah point 7 ngawtin hma an hruai a ni mai lova, head to head-a chungnung zawk an nih tel cheu bawk vangin champion turin an dinhmun a tha veng vawng hle.