Real Madrid-a cham zui zel duh Vinicius

Real Madrid-a cham zui zel duh Vinicius
Kum 2018-a Barnabeu club a zawm hnua Spanish top-flight league title pathum lakpui tling tawh V inicius Junior chu Real Madrid-ah a la hlim a, kum 2027 daiha a contract neih lai tawp hunah pawh khaw dang hmun dang hawi loa Spanish giants-ah bawk khawsak zui zel a duh thu a sawichhuak!
Real thuam inbel chunga La Liga title heti zat baka Champions League trophy pahnih leh Club World Cup title pahnih bawk hawn tling tawh Brazilian mihang chhaihnawmnah tawk zing tak hi sum tamna Saudi Pro League nena tunlai hian sawizawm a ni ve mek a, chu boruakah chuan Arab sum lam a awn loh thu leh La Liga club-a a contract neih lai tawp hnuah pawh Madrid-a cham zui zel a duh thu sawi chungin a rang thei ang bera inremna thar ziah leh theih ni se a duh tih a tarlang tel.
Karliamta Inrinnia Real Betis khelmuala 2-1-a Real Madrid tlawmna inkhel kha Vinicius-a tan inelna hrang hranga Real game vawi 300 a khelh tlinna chiah niin, heti zat game-ah hian goal 102 a thunsak tling tawh.
Brazilian chuan nizan Champions League round of 16 first leg result tarlan hman loh Madrid derby behbawma Thawhtannia press conference a hmachhawn tumin a contract neih lai pawhsei thuai thuai a duh thu hi a sawichhuak a, contract thar ziah a duh chhan pawh, “He hmuna ka hlim em vang,” tiin a sawi.
Thla hmasa khan Real hian Vinicius-a contract pawhsei chungchang an khawrpum hnai tawh tih thuthang a richhuak a, tunah Brazilian-in a duhna a auchhuahpui ve leh ta chiah a, an inrem hnai tura ngaih a ni.
South American mihang player chuan, “He hmunah hian duthusam hun ka tawng mek a, khawvela player tha ber ber, coach tha ber, president tha ber leh fans tha berte kiangah hun ka hmang a, mi zawng zawngin min hmangaih em em vek a, he aia hmun tha zawk hi ka tan a awm thei lo ang,” a tichhuak hial a ni.
FIFA men’s player of the year award for 2024 dawngtu Vinicius hian Real Madrid-a hlawhtlinna chan chu a naupan lai duhthusam a nih thu tarlang telin, “Tunah chuan he hmunah hian ka duhthusam tipuitling turin ka khawsa mek a, ka thawnthu ka ziak mek a ni,” a ti.
Kum 24 mi chuan sawizawmin, “Hnehna chu ka chang tawh ngei mai a, mahse, trophy tam zawk la thei dinhmunah ka la ding a, he club history ziaktu nih hi ka duh a ni. He hmunah hian player tha tak tak an awm teuh avang erawh chuan thil a awlsam duak duak dawn lo a, legend rualte ang nih ve hi ka duh mai a ni,” tiin a duhthusam a sawi.