Real Madrid an tlang ve leh ta

March 12, Nilai zan khan UEFA champions League last 16, second leg khelh zawh a ni a, champion lai Real Madrid chuan Atletico Madrid lakah vanneihthlak takin hnehna an chang a, quarter-final an lut. Real Madrid rual hian Aston Villa, Arsenal leh Borussia Dortmund ten quarter-final an lut ve bawk.
Real Madrid an vannei
Santiago Bernabeu-ah 2-1 a hneh lo chang tawh Real Madrid hi Atletico Madrid hmachhawn nawn leh turin Riyadh Air Metropolitano-ah an lenglut. An len luhna mualah bul an tan chhe viau a, inkhel tan atanga minute khat chhung lekin goal an chhuah nghal. Hma takah goal chhuah bawk mah se hun pangngai leh extratime a zawh thlengin goal an chhuah belh lo hlauh a, penalty shoot-out ah inhnial theih tak, titi siam laih khawpin an chak zui leh. Champions League-ah Real Madrid vanneihna a kaltluang zui zel.
Quarter-final lut thei tura chak mamawh Atletico Mdarid hian an mualah beisei phak bakin bul an tan tha a, inkhel tan atanga second 27-na lekah Conor Gallagher chuan hmahruaina goal a thun nghal. Hma takah goal an thun vangin an phur viau a, inrintawkna sang tak nen an mualah an inlan chhunzawm. An mualah chak ngei tum mah se hun tawp thlengin goal an thun belh thei tawh lova, Real Madrid pawhin goal an thun belh thei tawh bik lo bawk.
Hun pangngai leh extra-time-ah goal thun belh thei an awm loh vangin si belhkawmah 2-2 in an inhnehtawk a, chak zawk an awm thei lo. Chak zawk an awm theih loh vangin penalty shoot-out hmangin chak zawk zawn chhunzawm a ni. Penalty hi a pettu hmasa paliin an pet goal vek a. Atletico Madrid tana Julian Alavarez a chu a pathumna atan a penchhuak. Alvarez hian pet goal chiang viau mah se fel hlel a lo awm tlat thung. VAR rawn a nih hnuin Alvarez hian a ke vei lam leh ding lamin bakk a tawk ve ve nia hriat a ni a, a goal thun pawmsak a ni lo. Alvarez goal thun pawm a nih loh hnuin Atletico Madrid tan hian Marcos Llorente chuan an thelh zui leh nghal a. Real Madrid tan Lucas Vázquez chuan thelh ve bawk mah se 4-2 in hnehna an chang zui ta tho a, quarter-final an lut zui ta a ni.
Julian Alvarez penalty pet goal pawm a ni lo hian titi a siam zui nasa hle a, inhnialna a chawkchhuak tam hle. Al goal hnawl a nih vangin lungni lo viau mah se Champions League-a Real Madrid vanneih theihzia chiang taka lantirtu a ni leh tlat thung. Atletico Madrid hnawtchhuaktu Real Madrid hian quarter-final-ah PSV sawptu Arsenal an hmachhawn zui leh ang.
PSV mualah 7-1 ngawta hnehna lo chang tawh Arsenal hian nilai zan khan PSV Eindhoven hi Emirates Stadium-ah an mikhual ve thung. Gunners hi Mimualah chiang zeta hnehna chang tawh an nih vangin a that dan ang beriin an inlan tawh lova, an player thate an awltir. Arsenal manager Mikel Arte chuan PSV lakah hian a player chhawr rim pali chiah bul a tantir a, player pasarih zet chu season kal meka khel tlem zawk leh bul tan phak ngai lote an ni. An second team anga ngaih theih chhawr bawk mah se an mualah tlawm an pumpelh thei lo thung a, awlsam takin quarter-final an lut.
First Leg-ah 7-1 ngawta chak tawh Arsenal hian an mualah bul an tan tha viau a, goal an thun hma hle. Inkhel tan atanga minute 6-na lekah Oleksandr Zinchenko chuan hmahruaina goal a thun nghal. Hma takah goal chhuah mah se PSV an insiamtha thuai a, Ivan Perisic chuan minute 18-naah goal thunin an si phurh a sut. PSV in goal an thun hnu hian Arsenal tana khel tha tak Declan Rice chuan minute 37-naah hma an hruai nawn lehna goal a thun a, 2-1 a hmahruai chungin chawlhlawk an hmang.
Chawlhlawk hnu lamah PSV in tlawm pumpelh ngei tumin thapui an thawh a, an hlawhtling. Hun tawp dawn hnaih lam minute 70-naah Couhaib Driouech chuan goal thunin an si phurh a sut a, hun tawp thlengin goal dang a luh belh tawh lo. Gunners hian PSV lakah 9-3 zetin hnehna an chang a, fiahna hautak zawk hmachhawn turin an tlang.